Төмән өлкәсенең биш районындагы авыллар су астында калган дип әйтергә була. Мисал өчен, Вагай районы Тугыз авылында су басу нәтиҗәсендә халыкның күпчелеге өйләрен ташлап китәргә мәҗбүр булган.
Алар өчен вакытлыча урнашу урыннары булдырылган. Вагай һәм Заречный бистәләреннән тыш, су басудан зыян күрүчеләрне җирле мәктәпкә урнаштырганнар. Кайберләре туганнарына киткән.
Аксакаллар су басуның элек тә булганын әйтә, әмма бу кадәр су күтәрелгәнен алар хәтерләми. Авылда барлыгы 288 кеше яши. Аларның күпчелегенең йортлары су астында калган.
Мөхәммәт Хәбибуллин шуларның берсе. Ул башта су ул кадәр күтәрелмәс дип өметләнеп, бөтен кыйммәтле әйберләрне өскә күтәргән, әмма аның өмете акланмаган. Кешеләр генә түгел, авыллардагы хайваннар да зыян күрә. Кайберләре эт, песиләрне түбә башына күтәргәнен әйтә.
Авылларга керү юлларын шулай ук су баскан һәм бу коткаручыларның эшен тагын да катлауландыра. Коткаручыларның көне-төне эшләве әйтелә.
