Истанбул һава аланындагы теракт сәбәпле, Татарстанга оча алмаган Чаллының «Бисеринки» балалар ансамбле республикага бүген кичкә кайтачак. Бу хакта үз инстаграмда Татарстан президенты сүзчесе Эдуард Хәйруллин яза.
Истанбул аркылы Болгарстаннан иҗади бәйгедән кайтып килүче 11-12 яшьлек 15 биюче кыз хәзерге вакытта кунакханәгә урнаштырылган. Аларның берсе дә зыян күрмәгән. Элегрәк "Реальное время" Русия балалар омбудсмены Павел Астаховка сылтама белән эвакуация вакытында балаларның кайбер әйберләре һәм документлары югалуын язган иде.
Соңгы мәгълүматларга күрә Истанбулда шартлауда 41 кеше һәлак булды, 239 яраланды. Бу хакта Истанбул шәһәр башлыгы әйтте.
