Казан язучысы Гүзәл Яхинаның “Зөләйха күзләрен ача” сериалы “Россия 1” каналында 13 апрельдә күрсәтелә башлый. Ул атна ахырына кадәр көн саен 21.00 сәгатьтә эфирга чыгачак дип хәбәр ителә телеканал сайтында.
Сигез сериядән торган фильмны күрсәтү 16 апрельдә тәмамланачак.
“Зөләйха күзләрен ача” романы 2015 елда чыгып, Русиядә күпсанлы әдәби бүләкләргә лаек булды. Роман дөньяның 34 телендә дөнья күрде. Татарчага тәрҗемәсен шагыйрә һәм журналист Флера Тарханова башкарды.
2018 елның җәендә “Россия 1” каналы “Зөләйха күзләрен ача” романы нигезендә күпсериялы фильм төшерде. Төп рольне Чулпан Хамматова башкарды. Икенче пландагы рольләргә шулай ук татар театрлары артистлары да җәлеп ителде. Сериалның бер өлеше Казанда һәм Татарстанда төшерелде.
Моның өчен Лаеш районында Чулман ярында агач йортлардан махсус авыл да төзелде.
Фильмга саундтрек буларак "Ай былбылым" татар халык җыры сайланган. Аны Татарстанның атказанган артисты, "Голос" телепроекты җиңүчесе Динә Гарипова башкара.
Моннан тыш, сериалга җырчы Эльмира Кәлимуллина башкаруында "Өмет чаткысы" җыры да кергән. Ул композитор Эльмир Низамов музыкасына язылган.
Сериал телевизор экраннарына 2019 елның көзендә чыгачак диелде. Әмма аны күрсәтү ТАССРның 100 еллыгына дип, 2020 елга күчерелде.
Гүзәл Яхинаның авыр язмышлы татар хатыны турында әсәре татар җәмәгатьчелегендә кызу бәхәсләр кузгатты. Авторны татарларның милли сыйфатларын бозып күрсәтүдә гаепләделәр. Шулай ук аның татар халкының тормыш-көнкүрешен, милли күзаллавын, гореф-гадәтләрен белмәве дә искәртелде.
