Башкортстан президенты Рөстәм Хәмитовның республика хөкүмәте башлыгы вазифасын да үз өстенә алуы көтелмәгән хәл булды. Соңгы көннәрдә төрле дәрәҗә хакимият баскычларында да, гади җәмәгатьчелек арасында да бу гамәлнең сәбәпләренә төшенергә тырышалар. Гәрчә Рөстәм Хәмитов үзе инде бу адымның төп сәбәпләрен хөкүмәт утырышында әйткән дә иде.
Шулай да президентның әлеге үзгәрешләргә керешүендә ниндидер яшерен максатлар күрергә тырышучылар да бар. Кайберәүләр фикеренчә, әлеге яңалык киләчәктә Башкортстанда президентлык атамасын бетереп, фәкать республика башлыгы дигән исемне генә калдыру өчен әзерлек булып тора. Анысы да бик мөмкин, ни өчен дигәндә, төбәкләр җитәкчеләренең президент атамаларын бетерү хакында бар илгә бәян ителде.
“Ни өчен дигәндә, әлеге хөкүмәт артык үзаллы эш итә башлаган иде, туган-тумачалык, үз мәнфәгатьләрен күбрәк күз уңында тоту артты, ә икътисадны алга җибәрү буенча сизелерлек эшләр тормышка ашырылмады, – ди Илдар Габдрафыйков. – Шулай да президент хөкүмәтне отставкага җибәрмәде. Чөнки аның өчен республика Дәүләт Җыелышы-Корылтайның утырышын уздыру һәм шуннан соң гына министрлар кабинетын эшеннән бушату тәртибе бар”.
Илдар әфәнде сүзләренчә, Рөстәм Хәмитов керткән яңалык озакка сузылмаячак. “Сентябрь-октябрь айларында ук республика хөкүмәте рәисе тәгаенләнәчәк һәм ул вазыйфага, мөгаен да, әле яңа гына беренче вице-премьер итеп куелган Рәүф Ногманов билгеләнер”, ди Илдар Габдрафыйков.
