Tömän şähärendä “Bäyräm” biü kiçäsenä yörgän yäşlärneñ äti-äniläreneñ üteneçe tormışqa aştı. Xäzer alar “Äpipä” klubına kilep räxätlänep bii alalar.
“Azatlıq” nı tıñlawçılarğa uzğan yılnıñ noyäber ayınnan här atnanıñ pänceşämbesendä yäşlärneñ “Bäyräm” biü kiçäsenä cıyıluları turında söylägän idek. Tatar köyläre, uyınnarı belän aralaşıp barğan bu kiçägä ul-qızların cibärgän äti-änilär oyıştıruçılarğa nik bezneñ küñellärgä dä bäyräm yasamıysız digän üteneç belän çıqtılar. Häm menä berençe mart könne alarnıñ teläkläre tormışqa aştı. 80 keşe “Oçağ” kafesına “uçaq yanına” cıyıldı. Xalıq uyın qorallarında uynawçı osta Äbüzär Minnebaev kiçä başında tal'yanın tartıp här kemne dä kiçke uyınğa, su buyına uçaq yanına çaqırdı. Ul “Äpipä” köyen sızdırıp cibärügä kümäk biü başlanıp kitte. Annan “Yözek salış”, “Biş par” häm başqa uyınnar Fägil Kärimov, Cämilä Räximova başqarğan cırlar belän aralaşıp bardı.
“Äpipä” yaña talantlarnı da açtı. Kiçägä kilgännär Äwxät İbrahimovnıñ menä digän itep bayanda üze uynap üze cırlawın belä aldılar. Qunaqlar Tuqaynıñ qayçan tuğanın onıtıp cibärgän bulsalar da, şiğerlären yaxşı xäterlilär ikän. Şağirneñ tizdän bulaçaq tuğan köne dä iskä alındı. Ğaliä Wäliewanıñ bu çarağa mönäsäbättä: “Küñelgä yattı. Min kiçä genä işettem. İşetkäç tä yartı kön buyı telefonnan töşmiçä tanışlarımnı çaqırdım. Barlığı 10 keşe kildek. Xäzer bit min Tömändä yäşämim. Başta qızlarnı uqıtır öçen Qazanğa küçkän idek, xäzer Mäskäwdä torabız”,- dide.
Ğaliä apa yalğızı 7 bala tärbiäli ikän. Barsına da yuğarı belem birep, yaxşı urınnarğa urnaştırırğa tırışa. Bu xaqta, anıñ tormışqa qaraşı turında, alda bulaçaq xäbärlärebezneñ bersendä söylärbez äle. Ä bügen bit süzebez “Äpipä” kiçäse turında. “Kiçägä 10 tanışımnı alıp kilüemneñ säbäbe- barıbıznıñ da ruxı baylığın arttırırğa teläwdän”,- di Ğaliä apa.
Kiçägä kilgännär mondıy çara iñ kimendä ayına ber tapqır bulsa ide digän teläk tä äyttelär. Tömändäge ber genä aş yortında da tatar milli rizığı äzerlänmi. Oyıştıruçılar kiçä öçen maxsus öçpomaklar, qoş telläre peşerttelär. Qunaqlar öydä öçpoçmaq, qoş tele peşerergä waqıt ta citep betmi, kiläsendä dä milli rizıqlar äzerlänsen dip ütendelär.
“Äpipä” kiçäse kemnärneder tanıştırdı, kemnärneder oçraştırdı, kemnärneder qawıştırdı. İl'nur belän Güzäl yäşlär öçen ütkärelä torğan “Bäyräm” biü kiçäsendä tanışqan bulsalar, alarnıñ äti änilären “Äpipä” oçraştırdı.
Nail Alan, Tömän
