Rusiäneñ ORT tele kanalında “Tañ yoldızı” (“Utrennyaya zvezda”) tapşıruınıñ efirğa çıqmıy başlawına xäyran ğına waqıt ütte. Ä menä şul uq isemdä talantlı uquçılarnı barlıy torğan bäyge-festival' Tömän ölkäseneñ könyağında menä 16 yıl inde üzeneñ traditsiälärenä tuğrılıqta yäşäwen däwam itä. Tömän rayonınıñ tatar awıllarınnan cıyılğan iñ yaxşı cırçılarnı, biüçelärne, näfis süz ostaların sälämlärgä dip säxnägä kütärelgän Näsimä Zıykova da bu xaqta äytep uzdı. Ul Tömän rayonı tatarlarınıñ milli mädäni möxtäriäte räise.
“Tañ yoldızı” bäygese Yambay awılında ütte. Bu çarada 250 gä yaqın mäktäp uquçısı qatnaştı. Mädäniät yortınıñ aldınğı bülmäsenä uquçılar üzläreneñ qul eşlären kürgäzmägä quyğan idelär. Qışnıñ ğädättän tış salqın buluı alar icatına da tä’sir yasağan ikän. Yambaylar kiez iteklärne çäçäkläp çigergä öyränsä, Şıqçalar qurçaqların bäylängän kiemnärgä kiendergän idelär. Ä uzğan yılğı bäygedä ciñü ayulağan 11 yäşlek İlşat Gabdullin tamaşaçılarnı cırlawı belän genä tügel, cırlap qurayda uynawı belän dä soqlandırdı.
Cırçılar arasında iñ köçle alqışlar Şıqça awılınnan kilgän İlşatqa buldı. Jyuri isä iñ yuğarı bäyä bişle sanınnan da yuğarıraq 6 ball belän ike törkem çığışın bäyäläde. Talımxan awılınıñ 24 uquçı başqarğan “Udmurt xalıq biüen” häm Kaskara awılınıñ xalıq uyın qoralları ansamblen.
Tömän rayonında iñ ostalar bilgele buldı. Bu könnärdä Tömän ölkäseneñ tatar xalqı küp yäşi torğan başqa rayonnarında da şundıy uq bäygelär däwam itä. Tizdän ciñüçelär Tömän şähärenä ölkä bäygesenä cıyılaçaq.
Nail Alan, Tömän
