Comğa könne Qazanda çıqqan ber zur tirajlı gäzit şundıy xäbär çıqtı. İmeşter şähärneñ Sovet rayonı başlığı itep elekke yıllarda şul uq rayonnı citäklägän Alber Qamalievnıñ ulı Asqar näq şuşı comğa irtäsendä Sovet rayonı başlığı itep bilgelänä. Ämma comğa irtäsendä Sovet rayonınıñ yaña citäkçese itep bötenläy başqa keşe Cälil Söläymanov bilgelänüe turında räsmi xäbär çıqtı. Cälil Söläymanovnı şähärneñ kiñ cämäğätçelege belmäsä dä, ul Qazan idäräçeläre arasında kürenekle şäxes. Soñğı aylarda ul Sovet rayonı başlığınıñ berençe urınbasarı bulıp eşläde. Aña qädär Cälil Söläymanov TAİF kompaniäseneñ idärä strukturasında möhim wazıyfalar başqardı, 21 ğasır dip atalğan reklamalar fondın da citäkläde. Qayda ğına eşläsä dä, Cälil Söläymanovnı xezmättäşläre anı tıynaq, zıyalı häm üz süzen ütäwçe, ağımdağı eşlärne cirenä citkerep başqaruçı keşe bularaq belälär. Soñğı yıllarda ğädättä rayon başlığı bulıp zur külämle finans ağımnarı yäki zur mileklär xucası bulğan keşelär eşlilär.
Yaña rayon başlığı Cälil Söläymanovnıñ nindi xosusi şirkätlär, cirlär xucası buluı mäğlüm tügel. Ul idärä eşe belgeçe häm anıñ töp kapitalı keşelär belän eşläw dilär.
Sovet rayonınıñ elekke başlığı Al'ber Kamaliev Qazan şähäreneñ iñ abruylı citäkçeläre arasında buldı. Ul Qamil İsxakovnıñ Qazan başlığı bularaq eşçänlek cäyelderüenä yärdäm itkän ide. Alber Qamalivnıñ qızı Gölnara Tabaqçi şähärdä bilgele eşquar, maturlıq salonı, benzin salu stansiäse xucası häm xalıq deputatı bulıp kitte. Qamalivnıñ ulı Asqar şulay uq sälätle citäkçe. Ul xoquq fakul'tetın tämamlağaç, Tübän Qamada däwlät terkäw palatasın citäkläde. Xäzer ul Qazanğa qaytqan dilär.
Sovet rayonı başlığı itep anı quyu farazı oçraqlı ğına kilep çıqmağandır. Çönki ul näsel buyınça idärä ostası tügel, ä Tübän Qamanıñ elekke citäkçese İlsur Metşin belän bergä eşlägän şäxes. Äytergä kiräk, İlsur Metşin üze dä Sovet rayonı öçen çit keşe tügel. Tübän Qamağa başlıq bulıp kitkänçe şuşı Sovet rayonı administratsiäsendä apparat citäkçese bulıp eşlägän ide. Şulay itep Alber Kamaliev Qazandağı bik küp administrativ citäkçelärneñ uqıtuçısı, yul kürsätüçese buldı. Uzğan yılda ul layıqlı yalğa çıqqannan soñ rayon başlığı bulıp elek Avitözeleş rayonın citäklägän Foat İbätullin eşläp aldı. Qamil İsxakov Qazan xakimiätennän kitkännän soñ İlsur Metşin anı Sovet rayonı citäkçelennän azat itep, elek Tübän Qamada eşlägän Vladimir Fominnı bilgelägän ide. Xäzer Fomin Qazan munitsipal' berläşmäseneñ başqarma komitetında şähärdäge barlıq tözeleşlärne alıp baru belän şöğellänäçäk. Anıñ urınına Sovet rayonı citäkçe itep Cälil Söläymanov 1959 yılda Çuaşiä respublikası Batır rayonındağı Qızıl Çişmä awılında tuğan. Qazanda yuğarı belem alğan, ozaq yıllar buyı Aş- su säwdä şirkätendä general' direktor urınbasarı bulıp eşlägän.
Respublika cämäğätçelege anıñ ölkän abıysı – texnik fännär doktorı, Tatarstan fännär akademiäseneñ äğza möxbire, “Sälät” fondı citäkçese Cäwdät Söläymanov tağın da kübräk belälär. Soñğı yıllarda Çuaşiäneñ Batır rayonı yegetläre Qazandağı idärä strukturalarında uñışlı ğına üsep baralar. Äytik, Şul uq Sovet rayonı mäxkämäsendä räis bulıp yäş häm sälätle xoquq belgeçe Ğaziz Gıysmetdinov ta abruylı citäkçe. Çit töbäklärdän kilgän millättäşlär Qazanda belem genä almıyça, ğämäli eşlärdä üzläreneñ buldıqlılığın kürsätälär.
Gölnaz Şäyxetdin
