Bilgele bulğança, bu könnärdä Afrika çüllärendä Dakar-2007 ralliı bara. Anda Tatarstannıñ Çallı şähärennän KamAZ-master komandası çığış yasıy. 10 ğinwarda bäygeneñ 5 etabı tämamlandı. Läkin ul bezneñ sportçılar, döresräge Vladimir Çagin citäkçelegendäge törkem öçen şaqtıy ayanıç näticälär alıp kilde. 4 etap näticäläre buyınça bu törkem yök maşinaları arasında berençe urında bara ide. Läkin yarışnıñ Marokko öleşe Dakar çabışlarında 5 märtäbä ciñü yawlağan Vladimir Çagin ekipajın bäygedän kitärgä mäcbür itte. Çönki alar şaqtıy zur yul qazasına oçradı. Çabışnıñ başqa qatnaşuçıların uzğan waqıtta säğätenä 100 kmdan artıq tizlek belän barğan çaqta KamAZ taşlar öyemenä barıp bärelgän häm 3-4 märtäbä äylängän. KamAZ-master komandası wäkilläre mäğlümätlärenä qarağanda, näticädä Çagin törle däräcädäge cäräxätlär alğan, ekipajnıñ tağın ber äğzäse – Sergey Savostin – umırtqasın awırttırğan. Alarnıñ sälämätlegenä xäzer inde bernindi qurqınıç yanamasa da, bu törkem bäygedäge çığışın däwam itä almayaçaq.
Xäyer, tatarstanlılar Dakarda ciñügä ömetlären özmi. Yarışta respublikadan tağın 2 ekipaj köräşne däwam itä. Şularnıñ berse – İlgizär Mardeev citäkçelegendäge KamAZ älege 3 urında bara. Bügenge köndä berençe urınnı bili torğan Xans Steysi ekipajınnan alar säğät yarımğa qalışa. Dakarnıñ 6 öleşe Mavritaniädän ütä, anıñ ozınlığı – 817 km.
Gölnaz İlgizär
