Kiläse atnanıñ düşämbesennän Tömän ölkäseneñ könyağında tatar mädäniäte könnäre başlana. Bu çarağa Tömänneñ milli mädäniätlär yortında start bireläçäk. İrtänge 9 da uq “Tamaşa”, “Çişmä”, “Ramay”, “Äxtämnekelär” icat törkemnäre bäläkäy konsert kürsätep alğaç ta tatar xalqı küp bulıp yäşägän Wağay, Tobol, Yärkäw, Tübäntüde, Aromaş rayonnarına yul alaçaq. Artistlar öç törkemgä bülenep cäy köne yul bulmağan, sazlıqlar arasına urnaşqan awıllarğa da barıp citergä ömetlänälär. Ber atna buyı “il-cir kürep” qaytqaç yäkşämbedä Milli mädäniätlär yortında bu könnärne yomğaqlaw- Ğala konsert bulaçaq.
Tömän ölkäse tatarlarınıñ milli-mädäni möxtäriäte şurasında mädäni tormış öçen cawaplı Wälimä Taşkalova äytüençä, bu könnär qısasında problemalar da kütäreläçäk. Qulaylaştıru säyäsätenä tayanıp tatar awıllarında küp kenä mädäniät uçaqları yabıldı. Yalutr rayonınıñ Aslana awılında bulaçaq tügäräk östäl söyläşüendä näq menä şuşı mäs’älä kütäreläçäk.
-Kruglıy stol budet po problemam razvitiä tatarskoy kul'turı. Osnovnıymi voprosami budut optimizatsiä uçrejdeniy kul'turı. Mnogie işçut novıye formı v ANO çto bı vıyjivat'. Mı popıtayımsya pogovorit' imenno temi lyud'mi, kto zanimayıtsya na mestax. Wälimä Taşkalova äytüençä, äle moña qädär aldağı yıllarda bulğan mädäniät könnärendä problemalar turında ber qayçan da söyläşmägännär.
Tatar mädäniäte könnärendä ütäçäk çaralar yazılğan käğäzgä küz salsañ, Milli mädäniätlär yortı qarşında eşläwçe icadi berleklär häm Aslana awılı mädäniät yortı artistlarınnan başqalar bu çarağa cälep itelmägän. “Etnos” balalar üzäge, Tömän şähäre mädäniät üzäge törkemnäre, “Duslıq” xalıq cır ansamble, Tobol şähäre seber tatar mädäniät üzäge artistları, Arangulovlarnıñ kürenekle “Läylä” ansamble dä kürenmi.
Bu çara öçen Tömän ölkäseneñ milli eşlär komitetı 200 meñ sum aqça birä. Häm ul anıñ millätlär belän eşläw planına da kergän.
Ä menä yaña ğına Tobol şähärendäge Seber tatar mädäniäte üzäge xezmätkärläre üz köçläre belän “Milli aşlar kiçäse” ütkärgännär ikän. Bu xaqta üzäk xezmätkäre Rimma Xäbir'yanova söyläde.
-Bäyge dip atadıq qına inde bez anı. Milli aşlar peşergändä keşelärgä urın bilgeläw mömkin tügel. Xalıq bik aktiv qatnaştı. Üzläre peşerep alıp kildelär törle-törle seber aşları: bawırsaq, pärämäç. Qazannan kilgän apalar bulğandır inde göbädiä peşerep alıp kildelär. Studentlar da kilgän ide. Alar qızıq öçen äytäm, Kiewski tort satıp alıp kilgännär. Anı bik qızıq itep zaşçişçat' ittelär. Härkem üzeneñ blyudosın yaqladı. Qatnaştılar başqa millät xalıqları da. Qarap toruçılar bulmadı. Böten keşene dä östäl artına utırttıq, sıyladıq. Büläklär ällä ni birä almadıq. Alda tağın şundıy meropriätiälär bulsa, bez xalıqnı kübräk alıp kiler idek, dip taralıştılar.
Nail Alan. Tömän.