Bu yaña ictimaği oyışma. Kongressnıñ barlıqqa kilergä cıyınuı turında “Azatlıq” radiosın tıñlawçılarğa citkergän idek. Oyıştıru cıyılışında milli tormışqa bitaraf bulmağan barlığı 13 keşe qatnaştı. Mäs'älän, utırışta qatnaşqannarnıñ berse- Nasiä Urazova, ul Tömän ölkäseneñ kraynı öyränü muzeyı xezmätkäre, bu ictimaği oyışmağa zur ömetlär bağlıy. Näsiä Urazova äytüençä, muzeyda Xämit Yärmineñ bülmäsen açu mäsäläsen ölkä avtonomiäse şurası utırışında da, milli eşlär komitetı başlığı Mal'çewski aldında da kütärgän bulğan. Bügengä qädär qıymıldamawçı kürenmi.
Cıyılışta Nurulla Ğafur ulı Sattarov Tömän ölkäse tatarları kongressınıñ räise itep saylandı. Ul “Zapsibgazprom”nıñ yuridik xezmät bülege başlığı. Aña 42 yäş. Kongressnı oyıştıru teläge belän ütkän aldağı oçraşularda bu yaña oyışmanıñ türäse törle ictimaği oyışmalarda qatnaşıp tege yäki bu taraflardan uñay yäisä tiskäre bäyä alğan keşe bulmasqa tieş digän täqdimnär äytelgän ide.
Ä menä şurağa kerüçelär milli tormışta bilgele keşelär. 6 keşe arasında ozaq yıllar avtonomiä räise bulıp eşlägän Äxtäm Kayumov, üz waqıtında tatar mädäniät üzäge räise bulıp eşlägän Färit Xäkim, tatar xatın qızlar oyışması başlığı Bibinur Sabirova da bar.
Tömän ölkäse tatarlarınıñ kongressın oyıştıru cıyılışında ustavnı qabul itep, şura häm reviziä komissiäsen saylap ta betermädelär, ağımda bulaçaq milli çaralar turında da süz bulıp aldı. Ä menä şura äğzası Rinat Nasıyrov süzlärençä, kongress citdileräk eşlärgä totınırğa cıyına.
-Xökemät häm Rusiä prezidentı täqdim itkän milli proyektlarnı tatar awıllarına da alıp barıp citkerergä kiräk. Här awılda da “Tatarstan yaña ğasır” kanalın kürsätä torğan tälinkä bulırğa tieş,- di Rinat Nasıyrov.Kongressnı oyıştıru dokumentları yustitsiägä tapşırıldı. Ä şura äğzaları yaña ictimaği oyışma räsmiläşkängä qädär ük eş başladı. Tömän ölkäseneñ könyağındağı tatar xalqınıñ sotsial'-iqtisadıy, mäğärif häm mädäni xäle turında beleşmä tuplıy.
Nail Alan, Tömän