25-26 avgust Tatarstanda “militsiä könnäre” bara. Xoquq saqçıları xörmätenä törle tantanalı oçraşular, bäyräm konsertları ütkärelä. 25 avgustta “Piramida” mädäni küñel açu binasında kiçen Rusiä eçke eşlär ministrlığı eçke köçläreneñ cır häm biyu akademiä ansamble bäyräm konsertı quydı. Şul uq könne eçke eşlär ministrı Äsxät Säfärov keçe häm urta säwdä wäkilläre belän oçraştı. “Qazan” milli-mädäni üzägendä xoquq saqçıları häm säwdägärlär üzara xezmättäşlek cepläre qorırğa tırıştılar. Äsxät Säfärov säwdägärlärgä rişwätçelekne üzegez buldırmıysız mikän dip tä äytep quydı häm “Azatlıq”qa üzeneñ fikerlären citkerde.
Tatarstannıñ eçke eşlär ministrlığı wäkilläreneñ keçe häm urta säwdä wäkilläre belän oçraşuı näq bilgelängän waqıtta başlandı. 10 minutqa soñlağan jurnalistlar utırış bülmäsenä kertelde, ä annan kübräk soñlağannarnı formadağı xoquq saqçıları kertmädelär. Formadağılar üzläreneñ töp başlıqları kilgäç üzlären citdi totarğa tırıştılar. Tik-tomaldan torıp basıp çığıp kerep yörgännär dä az buldı. Qayber jurnalistlar utırıştan qızıq tapmadılar, säwdägärlär belän xoquq saqçılarına bu küreşep söyläşü kiräk ide buğay. Respublikanıñ eçke eşlär ministrı Äsxät Säfärovnıñ awızına qarap utırıp tınladılar annan sorawların birdelär. Utırış axırında Äsxät Säfärov säwdägärlärneñ kiçekmästän üti başlarğa kiräkle üteneçlären istä totıp, yärdämçelärenä sin menä moña sin änä tege säwdägär belän xezmättäşlek itärseñ dip yöklämälär birde. Tegeläre eşneñ nidän ğibärät ikänen añlağaç, käräzle telefonnarınnan başqa yärdämçelärgä şaltırata başladılar. Oçraşuğa kire qaytsaq, eşmäkärlär belän oçraşuğa eçke eşlär ministrlığınıñ törle tarmaq citäkçeläre dä bar ide. Çığış yasaw, söyläşülär waqıtında keçe häm urta cämğiättäge sotsial'-iqtisadıy role könnän-kön artuı äytelep ütte. Rusiädä keçe oyışmalarnıñ sanı 1 millionğa yaqın, alarda 17 millionlap keşe xezmät quya ikän. Eçke eşlär ministrı süzlärenä qarağanda, däwlät eşmäkärlekne üsterügä zur iğtibar quya. “Ministrlıq ta däwlätneñ älege säyäsäten ğämälgä aşıruğa zur öleş kertä. Soñğı yıllarda eşmäkärlek subyektların tikşerüne cayğa saldıq, bu protsessnı mömkin qädär açıq itärgä tırışabız,”- di ministr. Ul şulay uq üzeneñ xezmätkärläreneñ citkergän süzlärenä qarağanda qayber eşmäkärlärneñ cinayätçel törkemnär belän bäyläneşe barlığı xaqında da äytep kitte. Oçraşuda Tatarstannıñ şähär-rayonnarında säwdägärlärne qurqıtıp totqan 3 cinayätçel törkemne faş itü buyınça eş alıp barıluı da bilgele buldı. Bu süzlärne ministr rus telendä söyläsä, “Azatlıq”qa Äsxät Säfärov tatar telendä eşmäkärlär belän oçraşudan soñ tuğan fikerläre belän urtaqlaştı. Ä bezgä başta anıñ tiräsendä yörüçelär: “Ul tatarça söyli alır mikän? Borçımasağız äybäträk bulmasımı?” – digännär ide. Eçke eşlär ministrı başta rusça ğına biräm dip äytsä, ul äytkänen üzgärtep bezgä menä närsälär söyläde:
Audio
Bu Tatarstannıñ eçke eşlär ministrı fikerläre bulsa. Qullanuçılar bazarındağı xoquq bozular belän köräşüçe idäräneñ citäkçese, militsiä polkovnigı İlfar Xälimullin süzläre dä üzençälekle ide:
Bu xoquq sağında toruçılar fikerläre buldı. Oçraşu betügä eçke eşlär ministrı qanunğa qarşı çığuçı uyın avtomatları xucaların tınıçlandırırğa aşıqtı.
Röstäm İsxaqi