Qazanğa Konstantin Szyunıñ berençe tapqır kilü tügel inde. Ul 15 yıl elek başqalada uzğan boks buyınça SSSR çempionatında qatnaşıp çempion bulıp kitkän bulğan. Bu yulı inde ul dönya çempionı, boks yoldızı, tağın bik küp däräcäle urınnar alğan şäxes bularaq kilde.
Konstantin Szyu 1969 yılda Sverdlau ölkäse Serova şähärçegendä tua. Bik irtä boks belän şöğellänä başlıy. Xalıqara bäygelärdä Konstantin 1984 yıldan qatnaşa. Rusiä bokserları arasında ul berençelärdän bulıp 2001 yılda Avstraliädä professional - bokserlar arasında dönyanıñ absolyut batırı däräcäsenä ireşä. Xäzer Avstraliädä yäşi. Boks çempionı sportnıñ bu törendä üsär öçen çit ilgä çığarğa kiräk di. Avstraliädä üzeneñ bokserlar üsterü akademiäsen citäkli. Rusiädä Konstantin Szyu isemenä däw perçatka kiep yözlärne maturlıy torğan bäygelär ütkärüeneñ maqsatı taza, şäp yegetlärne barlaw häm iñ şäplären Avstraliägä çaqıru. Yarıy, ansı da monsı, boks buyınça dönya çempionınıñ Qazandağı säyäxätlärenä küz salıyq äle. Anı niçek, qayda häm kemnär belän oçraşuın Tatarstannıñ radio-televideniäläre, gäcitläre bik şäpläp söylädelär. Barsı da anı sport yoldızı itep, yäşlärgä ürnäk itep kürsättelär. Respublikanıñ xökümät başlığı Röstäm Miñnexanov belän qul qısışıp biznes turında da söyläşergä ölgerdelär. Konstantin Szyu Avstraliädä yullar tözüçe şirkätneñ räsmi wäkile ikän. Miñnexanovqa ul üzeneñ yul tözüçe şirkätneñ xezmätlären täqdim itä. 2011 yılda uzaçaq Universiada turında da söyläşep alalar. Tanılğan bokser Qazanda Universiadanıñ buluın teli, Konstantin Szyu isemendäge xalıqara boks qubığınıñ da kiläçäktä Tatarstan başqalasında kiläçäge ömetle bulaçağına ışana. Xakimiättäge citäkçelär, Qazanda qunaq bulıp kitkän dönya çempionı Konstantin Szyu häm başqa sport yoldızları; “Sport ul yäşlärgä faydalı, şöğellänsennär, boks tügäräklärenä yörsennär, köçle bulırlar ”- dilär. Qızğanıçqa qarşı, boks belän şöğellängän yegetlär üz ostalıqların sport bäygelärendä genä kürsätep qalmıy şul. Qazannıñ Kirov rayonında uram malayları boks belän şöğellänep kiçlären, tönnären uramda yalğız keşelärgä höcüm itälär. Başta tämäke soraw, annan aqça qısu häm axırı qağidäsez boks uyını. Kem äybäträk qorbannıñ yözen cimerä. Samara şähärennän KDU ğa uqırğa kilgän berençe kurs yegete, 17 yäşlek İldar belän bulğan oktäber waqiğası. Kirov rayonında kiçke cidençe yartıda fatirı işek töbenä qaytıp citkäç 20 yäşlek bokser yeget aqça sorıy, İldar “Yuq!”- digäç, 17 yäşlek yegetneñ yözen tege urıs yegete yözen cimerä. Yarıy axırı imgänü belän betmi qala, İldarnıñ borın, iren genä qanğa mançıla. Fatir işegennän keşelär çığa başlağaç uram yegete qaça. Şunnan İldarğa Qazandağı tanış abıyları boks belän şöğellänergä quşalar. Çönki alarğa da başqalağa kilgäç qıyın alırğa turı kilä, qıyınnardan alar boksqa öyränep üz-üzlären yaqlar däräcägä citälär. Monı bezgä İldarnıñ abıysı Rämis söylägän ide. Kem belä, bälki Konstantin Szyunıñ da bik yäşli boks belän şöğellänä başlawı yäşlegendäge qızğanıç waqiğalarğa bäyleder.
Röstäm İsxaqi
Röstäm İsxaqi