Tatarstanda respublika prezidentı yubileyı uñayınnan çaralar tämamlandı. Läkin alar turında törle mäğlümät çaraları äle haman da yaza, kürsätä, Qazanda uzğan tantanalarğa, utırış, cıyılışlarğa törle bäylär birü dä däwam itä. Bez isä şularnıñ iñ qızıqlıları xaqında sezgä dä citkerergä buldıq.
Respublika mäğlümät çaralarında Tatarstanda atna azağında ütkän cıyılışlar, bäyräm waqiğaların yaqtırtqanda, kübräk räsmi çaralarğa iğtibar ittelär. Böten TV häm radio kanalları, gäcitlär comğa kiçendä ütkän Rusiä Däwlät Şurası utırışı küzätte, Qazan Ratuşasında Mintimer Şäymievqa orden birgäne xaqında söyläde, kürsätte, yazdı. Yaña ğasır kanalı toraq mäs’äläsenä bağışlanğan utırışnı turı efirda kürsätep tordı, Yaña ğasır radiosında da şul uq waqıtta cıyılışnıñ barışın tıñlarğa mömkin ide. Vremya i den’gi gäcite isä Şura utırışınıñ tulı stenogrammasın, yäğni kemneñ närsä äytkänen bastırıp çıqtı.
Qazan ratuşasında Mintimer Şäymievnıñ tuğan köne uñayınnan oyıştırılğan räsmi qotlaw tantanası xaqında da mäğlümät şaqtıy buldı. Yaña ğasır kanalındağı atnalıq yomğaqlar programmasında çarada qatnaşuçılarnıñ fikerlären işetterdelär. Anda Kamil İsxaqov üzeneñ ostazı – Şäymiev turında cılı süzlär äytte. Kürşe Başqortstan respublikası citäkçese Mortaza Räximov, bezneñ büleşerlek närsäbez yuq, dip belderde. Tatarstan prezidentınıñ VP qulınnan Watan aldındağı xezmätläre öçen I däräcädäge ordenın alu mizgellären barısı da diärlek kürsätte. Matbuğatta da Mintimer Şäymievnıñ räsemnäre bik küp buldı. Tatarstan yäşläre gäcite tantanada Rusiä prezidentı yasağan çığışnı uquçılarına citkerde. Anda Bolar barısı da Tatarstan xalqınıñ iminlege öçen genä tügel, ä böten ilneñ qüäte häm berdämlege bärabärenä dä, Rusiä cämğiätendä totrıqlıqnı saqlaw öçen dä eşlänä, digän süzlär dä bar. Mintimer Şäymievnıñ cawap üzläre dä urın alğan gäcit bitlärendä.
Tatarstan prezidentına bağışlanğan maxsus yazmalar, tuğan kön belän qotlawlar da buldı. İlşat Äminev töşergän Mintimer Şäymievqa bağışlanğan dokumental’ fil’m da kürsätelde.
Mäskäw mäğlümät çaraları da atna azağında Qazanda bulğan waqiğalarnı iğtibarsız qaldırmadılar. Tatarstanlılar kebek mul itep bulmasa da, Rusiä Däwlät Şurası utırışı, anda qaralğan mäs’älälär xaqında da, Mintimer Şäymievnıñ yubileyı turında da alar da söyläde. Ä menä şimbä könne başqalanıñ Piramida küñel açu üzägendä ütkän tantana xaqında ällä ni mäğlümät birüçe bulmadı. Azatlıq radiosınnan tış, bu çaranı barı tik İzvestiya gäcite genä yaqtırttı. Piramidada bulğan gäcitneñ xäbärçese Vladimir Konstantinov üzeneñ kürgännären bik qızıqlı taswirlıy. Kiçä bik zamança, matur itep oyıştırılğan ide, ul lazer nurları yärdämendä kürsätelgän şoudan başlanıp kitte, dip yaza avtor. Tantanada aña respublika rayon häm şähärläre başlıqlarınıñ muşketerlar bulıp kienep cırlawı bik oşağan. Maşina çabışlarında qatnaşuçılar bulıp Gonsçik cırın başqaruçılarnı da iskä ala ul. Şulay uq säxnädä royal’ bulmaw säbäple nindider elektron uyın qoralında uynap cır başqarğan Äcerbäycannıñ Rusiädäge ilçese Polad Böl’-Böl’ oğlı xaqında da äytä Vladimir Konstantinov. Kiçägä kilüçelär arasında dawıl arqasında Frankfurtnıñ hawa alanında ber täwlek kötep utırğan Şäymievnıñ dustı Çıñğız Aytmatov, Rusiäneñ möftilär Şurası räise Rawil Ğäynetdin, finanslar ministrı Alekseyı Kudrin, tışqı eşlär ministrı urınbasarı Andrey Denisov, bilgele telejurnalist Eduard Sagalaev, Rossiyskaya gazetanıñ baş möxärrire Bladislav Fronin häm başqa bik küp däräcäle qunaqlarnıñ buluın da östi İzvestiya xäbärçese. Aña östäp bez dä tağın berniçä qızıqlı mäğlümät äytik. Mintimer Şäymievnı qotlarğa tanılğan cırçı Sofiya Rotaru da kilgän ide. Yubilyar häm cırçı ber-bersen ixtiramın belderep çäçäk bäylämnäre bireşte. Axırda Rotaru Şäymievnı biergä dä çaqırmaqçı ide. Läkin soñladı. Prezident inde qaytıp kitkän bulıp çıqtı. Yubilyar urınına Sofiya Rotaru belän anıñ kiñäşçese Rafail Xäkimovqa biergä turı kilde.
Gölnaz İlgizär