21 майда Болгар җирендә Истәлек билгесе бинасы һәм Икмәк музее ачылышы булды. Бу чаралар Идел буе Болгар дәүләтенең 922 елда ислам динен кабул итүенә багышлап оештырылды. Анда дин әһелләре, дәүләт эшлеклеләре, биналарны төзүчеләр, журналистлар һәм йөзләгән санда гади халык катнашты.
Ачылу тантанасыннан соң Татарстан мөселманнары диния нәзарәте рәисе Илдус Фәиз һәм Русия үзәк диния нәзарәте мөфтие Тәлгать Таҗетдин хезмәттәшлек турында килешү имзалады.
10 июньдә шушы урында Болгар җыены узачак. Әлеге җыен вакытында мөселманнар арасында зур шау-шу тудырган “Саклаучы” сыны урнаштырылыр дип көтелә. Азатлык хәбәрчесе шушы мәсьәләгә карата җирле халыкның фикерен белеште.
