Уфа егете Эрнест Яхин да Кореядан буш кул белән кайтып китә. Ике төрле ярышта - озын трамплинда чаңгы белән сикерүдә һәм 10 чакрымга чаңгыда узышуда Эрнест гомуми нәтиҗәләр нигезендә 35нче урынны алды.
Эрнест бу спорт төрендә Русиядән катнашкан бердәнбер спортчы иде.
Русия Халыкара Олимпия комитетына (ХОК) 15 млн доллар штраф түләде. Русиянең Олимпия комитетын акчалата җавапка тарту турында ХОК карары узган елның декабрь аенда чыкты. Халыкара комитет шулай ук Русия комитетын квалификациясеннән вакытлыча мәхрүм итте. Бу гамәлләр Сочидагы Олимпиасына бәйле килеп чыккан допинг җәнҗалы аркасында булды.
Әлегә кадәр Русия Олимпия комитетының халыкара оешмада әгъзалыгы туктатылып торды. Пхенчханда Олимпия уеннары ябылыр алдыннан Русия оешмага кире кайта ала, һәм штраф түләү моның өчен төп шартларның берсе булып тора. Таләпләр тиешенчә үтәлгән очракта, быелгы уеннарда ХОК әләме астында чыгыш ясаучы Русия такымы Олимпиаданың ябылу тантанасында үз милли әләме белән катнашырга мөмкинлек алачак.
Әммә бу керлингчы Александр Крушельницкийның канында тыелган мельдоний куллану билгеләре табылу аркасында әлегә шик астында кала.
21 февраль, 12нче көн, медальләр
| алтын | көмеш | бронз | |
| 1 Норвегия | 13 | 11 | 9 |
| 2 Германия | 12 | 7 | 5 |
| 3 Канада | 9 | 5 | 7 |
| 4 Нидерланд | 6 | 6 | 4 |
| 5 АКШ | 6 | 4 | 6 |
| - - - - - - | |||
| 20 Русиянең олимпия атлетлары | 0 | 4 | 9 |
Русия керлингта алган бронз медаленнән колак какты. Керлингчы Александр Крушельницкий канында тыелган матдә мельдоний куллану билгеләре табылганнан соң, ул һәм аның белән бергә чыгыш ясаган хатыны Анастасия Брызгалова Олимпия-2018 медальләреннән рәсми рәвештә мәхрүм ителделәр. Бүләк дүртенче урын алган Норвегия парына күчәчәк. Крушельницкий шулай ук ярышлардан вакытлыча читләштерелде. Бу бронза әлеге спорт төрендә Русия тарихында беренче Олимпия медале иде.
Фигуралы шууда Русия өчен чыгыш ясаучы татар кызы Алинә Заһитова күнегүләр вакытында катлаулы комбинация башкарып үзенең бу спорт төрендә дөньяда иң яхшылардан булуын раслады. Хәзер Олимпия уеннарында кыска програмнар нәтиҗәләре белән Алинә беренче урында бара. Күнегүләрдә ул рәттән биш тапкыр "өчле" сикерү башкарды. Мондый сикерүләрне дөньяда беркем дә булдыра алмый, хәтта ирләр да. Алинәнең шушы уңышларына карамастан, Русиянең танылган спорт эшлеклеләре – тренерлар Татьяна Тарасова, Илья Авербух һәм башкалар мәгълумат чаралары белән әңгәмәләрендә ачыктан-ачык Алинәнең көндәше Евгения Медведевага җиңү телиләр.
Шулай да, ике мәртәбә Олимпиада чемпионы булган фигуралы шуучы Евгений Плющенко Алинә Заһитова белән "беркемне дә чагыштырып булмый" дип белдерде. "Спорт-Эксперсска Плющенко: "Бу кыз безнең спорт төрендә яңа сәхифә ача. Башкалар әлегә булдыра алмаганны эшли – програмны соңгы чиккә кадәр катлауландыра, барлык сикерешләрне икенче өлешкә кертә. Алар сәнгатьчә, биеклек һәм очыш ераклыгы яхшы. Техника ягыннан гына карасак, мин Алинәне Женядан өстенрәк күрәм" дип сөйләгән.
Хатын-кызлар биатлон эстафетында Беларус такымы алтын медаль яулады. Дүрт кыз арасында Дарья Домрачева белән Надежда Скардино да бар. Элек аларның икесен дә өметсез дип Русия җыелмасыннан куып чыгарганнар иде. Соңрак алар Беларус өчен чыгыш ясый башлады. Алтын яулаган дүрт спортчы арасында бер казакъ кызы да бар – Динара Әлимбәкова.
Русия исә быелгы Олимпиаданың биатлон ярышларында бер медаль дә яулый алмады.
Беларус медале аз булса да, татарларга да кагыла – Домрачеваның биатлонда беренче укытучысы Башкортстанның Стәрлетамак шәһәрендә туып үскән спортчы һәм тренер Альберт Мусин була.
Уфада туып үскән, Лиллеһаммерда (Норвегия) 1994 елгы Кышкы Олимпия уеннарында тау чаңгысы ярышларында көмеш медаль алган Светлана Гладышева такымлы чаңгы спринты ярышлары вакытында трибунага 1945 елда совет солдатлары Рейхстагта күтәргән 150нче дивизия байрагының күчермәсен алып кергән.
Олимпиада оештыручылары аны Гладышевадан алырга теләде, тик спортчы аны бирүдән баш тартты. Бу хәл тавыш-гауга чыгарды. Гладышева: "Мин бу әләмне яшермәячәкмен! Бу минем милләтемнең әләме! Минем милләтем – дөньяда иң бөек милләт!" дип әйтте.
Олимпия уеннары барган Пхенчханда төшерелгән видеоязмаларның берсендә берничә Татарстан байрагы күренеп калды. Алар белән янәшә Русия әләмен дә күреп була, анысына "Зеленодольск" дип язылган. Видео чаңгы ярышлары вакытында төшереп алынган.
Олимпиадада катнашучы чаңгы узышчылары арасында Яшел Үзән егете Андрей Ларьков та бар. Мөгаен Татарстан әләмен нәкъ менә аның җанатарлары күтәреп чыккандыр. Элегрәк Ларьков чаңгы эстафетында көмеш медаль яулаган иде.