Украина президенты Владимир Зеленский кайбер оешмаларга каршы чикләүләр турында фәрманга кул куйган. Исемлеккә Татарстандагы берничә оешма да кергән. Фәрман Украина президенты порталында дөнья күргән.
Чикләүләр “Казан оптика-механика корылмасы” ширкәтенә һәм Казанның Липатов урамында урнашкан “Швабе-технология лабораториясе” акционерлык җәмгыятенә карата кертелгән. Шулай ук Татарстан Республикасы фәннәр академиясе һәм “Нижнекамскнефтехим” ширкәте дә чикләүләр исемлегенә эләккән.
Фәрманда әйтелгәнчә, әлеге оешмаларның активлары томаланачак, сәүдә гамәлләре чикләнә, аларга капиталны Украинадан читкә чыгару тыела, икътисади һәм финанс бурычларын үтәү вакытлыча туктатыла, лицензия һәм бүтән төр рөхсәт документлары гамәлдән чыгарыла яки туктатыла. Чикләүләр кысаларында мәдәни алмашулар, фән өлкәсендә хезмәттәшлек, мәгариф һәм спорт ягыннан багланышлар да бетерелә.
Украина президенты кул куйган фәрманда Русия, Кырым, Украина һәм башка илләрдән 235 оешма телгә алына.
Белешмә: Кырым аннексиясе
Русия Кырымны 2014 елда канунсыз референдум нәтиҗәләре нигезендә аннексияләде. Тавыш бирү Украина кануннарына каршы килеп һәм Кырымны Русия хәрбиләре үз кулына алгач уздырылды. Киев һәм Көнбатыш илләре моны халыкара хокук нормаларын бозу дип саный. Мәскәү Кырымны Русиягә кушуны "тарихи гаделлекне торгызу" дип атый.
- 16 март 2014 — Кырымда дөнья танымаган референдум уза
- 17 март 2014 — бәйсез Кырым республикасы игълан ителә
- 18 март 2014 — Кырымның Русиягә керүе турында килешү имзалана
