Федерация шурасы әгъзалары төбәк прокурорлары вазифаларына Русия президенты Владимир Путин тәкъдим иткән бөтен намзәтләрне дә хуплаган. Бу хакта югары пулат сайтында әйтелә.
Сенаторлар шул исәптән Татарстан прокуроры Илдус Нәфыйковны Мари Иленә билгеләүне дә хуплаган. Татарстан прокуроры вазифасына Альберт Суяргуловны тәкъдим итү белән дә ризалашканнар.
Альберт Суяргулов - Петербур прокуроры урынбасары. 1982 елда туган, Петербурның хәрби-диңгез институтын һәм Петербур дәүләт университетын тәмамлаган. 2010 елдан башлап Ленинград өлкәсе һәм Петербур прокуратураларында эшли.
- 2013 елда озак еллар дәвамында Татарстан прокуроры булып эшләгән Кафил Әмировны пенсиягә озаттылар. Аның урынына урынбасары Илдус Нәфыйков килде. Аның беренче зур эше – "Леруа Мерлен" сәүдә үзәген ачуда коррупция очрагын фаш итү булды. Аның "җиңел кулы" белән Татарстан юстиция министры булып эшләгән Мидхәт Кормановка эшеннән китәргә туры килде. Улы Илдарның коррупция очрагы аркасында ул гариза язды. Бу – Татарстанда зур вазифадан китүнең иң шау-шулысы булды.
- Русия прокуратурасының мәктәпләрдә тикшерүләр уздырып, Татарстан балаларга татар телен канунсыз укытып ята дип белдерүенә дә алты ел була. Бу вакыйгалар Русиянең башка милли төбәкләрендә дә барды, әмма бары Татарстанда гына прокуратура зур җинаятьне фаш иткән кебек эш итте.
- Җәмгыятьтә бу көчле ризасызлык уятты. Халык басымы белән — монда төрледән-төрле видео мөрәҗәгатьләр, мәйданнарга чыгып "Туган тел"не җырлау, Татарстан Дәүләт шурасы каршында яшьләрнең депутатларга "Әлифба" китапларын таратуы да керә — республика хакимияте дә федераль үзәккә сүзен җиткерергә тырышты. Ахыр чиктә Татарстан прокуроры Илдус Нәфыйков кырт кисте: татар теле мәҗбүри укытылмаячак, дәресләргә атнасына 3 сәгать вакыт аерыла, ә татар телен яклап ризасызлык белдерүләр экстремизмга тиңләнәчәк.
- Шулай ук Татарстан прокуроры өйдә укучы балалардан да экстремизм эзләде. "Өйдә белем алучы балаларның мәктәпкә беркетелмәвенә, аттестация узарга килмәвенә чик куярга. Бу мәсьәләгә җитәрлек игътибар булмау үсмерләрне экстремизмга җәлеп итүгә җирлек тудыра, социаль яраклашуга комачаулый", диде ул.
- Заманында Татар иҗтимагый үзәге рәисе Фәрит Зәкиев "Илдус Нәфыйковның хыялы - ТИҮне бөтенләй ябу", дигән иде. 2021 елның 15 гыйнварында Татарстан прокуратурасы ТИҮне экстремистик оешма дип тануны сорап Татарстан Югары мәхкәмәсенә мөрәҗәгать иткән иде.
- ТИҮ рәисе Татарстан прокуратурасы оешманы ябу турындагы карарны, үз вәкаләтләре кысаларыннан чыгып, канун бозулар белән кабул иткән, дип саный. "Берәр иҗтимагый оешманы ябу, аның эшчәнлеген туктату өчен башта мәхкәмә карар чыгарырга итергә тиеш. Аннан соң гына бу оешманың эше туктатылырга тиеш. Татарстан прокурорының канунсыз эш итүе баш прокуратура тарафыннан туктатылырга тиеш. Чөнки Татарстан эчендә кануннар үтәлми", - дип белдерде Фәрит Зәкиев Азатлыкка.
Белешмә: Илдус Нәфыйков
Илдус Нәфыйковка 63 яшь. Ул 1960 елның 12 июнендә Куйбышев районы (хәзерге Спас районы) Кузнечиха авылында туган.
1983 елда Казан дәүләт университетының юридик факультетын, "хокук белеме" белгечлеген тәмамлаган. 1977-1978 елларда Куйбышев автотранспорт оешмасында слесарь булып эшләгән. 1983-1986 елларда Брежнев шәһәренең (хәзерге Чаллы) Комсомол районы прокурорының өлкән ярдәмчесе булган.
Алдагы ике елда шәһәр прокуратурасының өлкән тикшерүчесе, аннан соңгы ике елда КПССның Яр Чаллы шәһәр комитетының идеология бүлеге инструкторы була. 90нчы еллар башында биш ел буе Чаллы прокуроры урынбасары, 1995-96 елларда беренче урынбасары булып эшли.
1996-2000 елларда Түбән Кама, 2000-2007 елларда Чаллы прокуроры була.
Шуннан соң Нәфыйков Казанга күчеп килә һәм шәһәр прокуратурасын җитәкли.
2013 елдан Татарстан прокуроры.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум