Matbuğat közgeseneñ bügenge çığarılışında bez sezne küptän tügel genä 85 yıllıq yubileyın bilgeläp ütkän Tatarstan jurnalınıñ soñğı sannarı belän tanıştırıp kitärbez. Jurnalnıñ 12 sanı basmanıñ yubileyına bağışlanğan. Monda Tatarstan jurnalı redaksiäseneñ xezmätkärläre belän tanışırğa, bäyräm uñayınnan uzğan çaralar, alarnıñ niçek ütüe xaqında belergä bula, şulay uq basmanı qotlawçılarnıñ cılı süzlären uqırğa mömkin. Jurnalnıñ tarixı da basılğan älege sanda. 1920 yıldan Vestnik Tatarskogo oblastnogo komiteta RKP(b) digän isem astında dönya kürä başlağan basma Tatarstan isemen 1991 yılnıñ 1 ğinwarınnan ala. Jurnalda Tatarstan säyäsäte, iqtisadı, mädäniäte, tarixı, xalıqnıñ könüzäk sotsial’ mäs’äläläre kiñ yaqtırtıla. Xäzer ul xaqlı räweştä respublikanıñ berençe jurnalı sanala, dip yazalar üzläre turında Tatarstan jurnalında.
Monnan tış basmanıñ 12 sanında Qazannıñ yaña citäkçese İlsur Metşinnıñ älege wazifadağı berençe äñgämäsen uqıp bula. Ul bügenge könneñ iñ aktual’ temalarına üz fikerlären citkerä, üzeneñ kiläçäkkä eş plannarı belän urtaqlaşa. Mäsälän, töp eş yünäleşläre dip İlsur Metşin Qazanda, mäğärif, sälämätlek saqlaw, toraq-kommunal’ taqmaqlarına ayıruça iğtibar kürsätäçäge xaqında belderä. Ruxiät rubrikasında isä Valeriya Poroxova xaqında uqırğa mömkin. İslam dinen qabul itkän, Qor’änne rus telenä tärcemä itkän İman Valeriya Poroxovanıñ qızıqlı fikerläre belän dä tanışırğa bula yazmada.
Tatarstan jurnalınıñ 2006 yıldağı berençe sanı isä Mintimer Şäymiev belän oyıştırılğan äñgämädän başlanıp kitä. Ul Maqsat-telägebez – härwaqıt berençe bulırğa dip isemlängän. Şul uq sanda respublikanıñ 2006 yılğa byudjetı belän uquçılarnı Tatarstannıñ finans ministrı Radik Ğayzatullin tanıştıra. Däwlät Şurasınıñ byudjet, salımnar häm finanslar komitetı räise İlsur Safiullin belän äñgämä dä şuşı uq temanı däwam itä. Şulay uq jurnalnıñ 1 sanında respublikanıñ Bua rayonı xaqında da beleşmä alırğa bula. Rayon häm anıñ eşçänlege turında Bua başlığı Äğläm Sadretdinov häm rayon citäkçeläre söyli. Ä Tatarstannıñ Däwlät Şurası deputatı Räzil Wäliev isä, milli elita xaqında uylana. Milli elita qayan başlana digän yazmada ul tatar xalqınıñ elitası başqa xalıqlar, millätlärnekennän bik nıq ayırılıp tora, digän fiker belän urtaqlaşa. Şulay uq ul, XIX ğasır axırı-XX ğasır başı tatar bayları millät öçen närsä genä eşlämägän, mäktäp, mädräsälär açqan, gäcit-jurnallar da çığarğan, ä bügenge millionerlarıbız, milliarderlarıbız zavod-fabrikalar totalar, aqçaları bixisap, läkin alarnıñ ber genä mäktäp açuın dä iskä töşerep bulmıy, dip uftana ul. Tatarstan jurnalınıñ älege sanında Räşit Xämädiev turında istäleklär belän da tanışırğa bula.
Bügenge programmada Tatarstan jurnalına möräcäğät itüebezneñ tağın ber säbäbe bar. Şuşı könnärdä genä ber qızıqlı xäbär bilgele buldı. Jurnal redaksiäse jurnalistlar öçen premiä buldırğan ikän. Älege aqçalata büläk tanılğan jurnalist häm respublikadağı şaqtıy ğına qäläm ostalarınıñ ostazı bulğan Florid Äğzämov isemen yörtäçäk. Bu xaqta tulıraq mäğlümät alır öçen bez Tatarstan jurnalınıñ baş möxärrire Rifat Fättäxovqa möräcäğät ittek. Florid Äğzämov isemendäge premiä turında ul bezgä menä närsälär söyläde.
Premiälär 3 nominatsiädä bulaçaq – Tatarstan matbuğatın üsterü öçen, Tatarstan gäcit-jurnallar, matbuğat, kitap näşriäte ölkäsendä ozaq yıllar näticäle eşlägän öçen, tatar matbuğatı tarixın öyränü ölkäsendäge qazanışlar öçen. Şulay uq Qazan däwlät universitetınıñ jurnalistika bülege studentları öçen dä ike premiä buldırılaçaq. Premiälärne Florid Äğzämovnı iskä alu kiçäsendä tapşırılaçaqRifat Fättaxov fikerençä, Florid Äğzämov isemendäge premiä buldırudan tış, anıñ yubileyı uñayınnan başqa iskä alu çaraları da kürelergä tieş. Ul şähärneñ ber uramına tanılğan jurnalistnıñ isemen birergä, ul soñğı yıllarda yäşägän yortqa memorial’ taqta urnaştırırğa täqdim itä.
Gölnaz İlgizär