Tatarstanda fänne üsterü, aña yärdäm itü haman iğtibar üzägendä. Respublika Fännär akademiäseneñ yaña citäkçese bilgelängäç, xökümätneñ bu tarmaq belän qızıqsınuı tağı da arttı. Düşämbe könne Tatarstannıñ Ministrlar kabinetında fän üseşendä östenlek birgän yünäleşlär programması tikşerelde. Läkin bu yulı da, inde öçençe tapqır rättän, programma xökümät tarafınnan raslanmadı.
Respublikada 2006-2008 yıllarda fän üseşendä östenlek birelgän yünäleşlär programmasın xökümät utırışında Tatarstan Fännär akademiäseneñ vitse-prezidentı Şamil Çabdarov täqdim itte. Anıñ süzlärenä qarağanda, programmada respublika iqtisatı öçen kiräkle häm möhim yünäleşlärdäge fänni proyektlarnı saylap alıp, alarnı tormışqa aşıru qaralğan. Şuşı maqsatqa 116 million sum aqça sorıy Fännär akademiäse. Läkin qayberäwlär, bu aqçalar barı tik akademiäneñ ağımdağı eşlären alıp barırğa ğına citäçäk, zur proyektlarnı tormışqa aşıruğa isä ayırım finanslaw kiräk, digän fiker äytte. Röstäm Miñnexanov isä, programmada anı tormışqa aşıru yulları bilgelänmägän, ul tieşle däräcädä eşlänep betmägän dide. Şaqtıy ğına barğan fikerläşüdän soñ, programmanı raslamasqa buldılar. Kiläçäktä tulılandırılğan programma ğalimnär, xökümät äğzäläre tarafınnan ğına tügel, ä eşmäkärlär, törle fänni üzäklär citäkçeläre belän bergälektä tikşerelergä tieş.
Respublikada fän üseşendä östenlek birelgän yünäleşlär programmasınıñ Ministrlar Kabinetı tarafınnan raslanmıyça, kire cibärelüen ğalim, etnologik-monitoring üzäge citäkçese Damir İsxaqov Fännär akademiäseneñ uñışsızlığı dip sanıy. Çönki fänne täräqqiät itüdä östenlekle yünäleşlär bilgelänmägän, ä programmada qaralğan närsälär nigezdä Fännär akademiäsendä eşläwçe ğalimnärneñ teläkläre belän genä bäyle.
Tatarnıñ üseşenä bäyle humanitar ölkädä östenlek birergä kiräk fän üseşe yünäleşlärenä kilgändä isä Damir İsxaqov menä nindilärne iskä alıp kitte.
Minemçä, berençe urında torırğa tieş tatar milläteneñ xäzerge üseş problemaları. Bügenge köndä tatarlarnıñ Rusiä buyınça üseş programması yuq, ul buldırılmağan. Fännär akademiäse, ğomumän, tatarlar arasında närsä barğanın belmi. Şulay uq tel yağınnan da problemalar tieşle däräcädä öyränelmägän. Tağı ber ähämiätle närsä – terminnar mäs’äläse. Bezgä fundamental’ mäs’älälär turında söyläşkändä, alarnı bügenge kön wazğiätenä qarap yaraqlaştıru möhim. Millätneñ yäşäyeş formaların, aña bäyle iqtisadi problemalarnı öyränergä kiräk, säyäsi mäsällär, din tiräsendä dä bik nıqlap eşlise bar Fän ölkäsendä uñışlı eş alıp baru öçen Damir İsxaqov fikerençä akademiäneñ oyışu formaları da üzgärergä tieş.
Gölnaz İlgizär
