Tügäräk östäl artında “Sputnik-Trans-Serwis- Qazan”, “Troykaplyus K”, “Persona Grata” häm başqa turistik şirkät citäkçeläre başta Qazan şähär Şurası deputatı, “Yevrokaskad” açıq aksionerlıq cämğiäte direktorı Nail Bikmullinnıñ süzlärenä qolaq salıp utırdılar. Annan söyläşügä üzläre dä qısıldılar. Nail' Bikmullin qunaqxanälärneñ bügenge torışına, anı tözüdä häm eşlätep cibärüdäge problemalarnı sanap uzdı. Qunaqxanäneñ xezmät kürsätü däräcäsen kütärergä kiräklegen iskärtte. “Täcribägez citmäsä Mäskäwgä, yäki başqa turizm nıq üseş alğan şähärlärgä barıp qaytığız! ”-dip tä kiñäş birde. Anıñ süzlärenä qarağanda bügenge köndä Qazanda yaqınça 3200 urınlı 37 qunaqxanä eşli. “Miraj” qunaqxanäse genä 5 yoldızlı. Tağın ike qunaqxanä 2-3 yoldızlılar, qalğannarına äle “yoldız” birelmägän. Şuña da qaramastan “Ekonom-klass”lı az byudjetlı qunaqxanälär bik az di şähär deputatı.
- Ayaqqa basıp kitä almağan qunaqxanälärgä dä mömkin bulğan l'gotalardan faydalanıp qalıp, eşläw däwerendä başqa ısullarnı qullanıp ternäklänep bula - di ul.
Nail Bikmullin Qazandağı küp kenä qunaqxanälärdä tärtip yuqlığına da basım yasadı. Bu urında Qazannıñ “TroykaPlyuSK” häm Mäskäwneñ “Wiaduq” turistik şirkätläre arasındağı ğauğanı iskä töşerep kitärgä bula. Aprel' ayında kilgän mäskäwlelär Qazanğa bötenläy kilmäs däräcägä citep qaytıp kitkännär. Qunaqlar Qazanda bernindi millilek tapmağannar, alarğa Sumda qullanu waqıtı çıqqan rizıqlar birgännär, qunaqxanädä ber urınğa ikeşär keşe yatqırmaqçı bulğannar. Boları qullanuda bulğan qunaqxanälär, alar başqalağa kilgän turistlarnı qänäğätländerä almıylar ikän. Şuña da turistlarnıñ kübese könendä kilep könendä kitep tä bara. Ä yañaların tözergä yaqınça ber million dollar aqça kiräk, şulay uq äzer binanı arendağa alu bäyälär dä qimmät. Söyläşüdä qunaqxanä biznesın häm turistlıq biznesen ikegä bülep qararğa kiräk digän süz dä yañğıradı. İñ awırı qunaqxanä biznesı ikän. Tügäräk östäl artındağı başqalada turizm üseşe buyınça cawaplı keşelär 15 avgustta Qazan munitsipal' berämlege başqarma komitetı citäkçese Marat Zahidullin belän oçraşaçaqlar. Alar Marat Zahidullin belän oçraşqanğa qädär repetitsiä ütkärdelär, närsä söyliäçäklären barladılar. Şunnan alar kafe, restoran, aşxanälärdäge xezmät kürsätüne, aşu-eçü yaqların da bäyäläp üttelär. Qazanda öçpoçmaqnı cirenä citkerep Bauman uramındağı “Çäy yortında” ğına peşerälär ikän. Qalğan cirdä ul çile-peşle kileş satıla di turşirkät wäkilläre.
- Milli rizıqlarnı ğomumän ber genä turistlarnı qabul itä torğan urın da peşerä belmi! - di Qazan şähär deputatı, eşmäkär Nail Bikmullin.
Kiñäşmädägelär rizıqlarğa ayıruça iğtibar ittelär.Çittän kilgän turistlarğa kübräk üzebezneñ milli aşlarıbıznı, rizıqlarıbıznı tämle, matur itep awız itterergä kiräk. Tatarstan tatar milli rizıqları belän dä turistlar küñelendä qalırğa tieş - di tışqı elemtälär häm turizm komitetı räise wazifaların başqaruçı Güzäl Şäyxullina. Annarı başqaladağı kofelar irtänge säğät 10 da ğına açılalar, unğa qädär turistlar aç yöri. Bu mä’säläne dä kütärergä kiräklegenä basım yasaldı.
Qazannıñ sınlı sänğät muzey citäkçese Älfiä Tutayıwa turistlarnı Tatarstannıñ istälekle urınnarına säyäxätlärneñ, andağı ekskursovovlarnıñ tübän däräcäle buluın äytte. Aña qalğannar da quşıldılar. Älfiä Tutayıwa süz belän Qol Şärif mäçetenä dä suğılıp kitärgä ölgerde. Ul mäçetkä ber ük yualıqnı qat-qat kiertep kertülärenä qarşı töşte.
Bu utırıp söyläşü 2 säğätkä qädär däwam itte. Monda Tatarstannıñ nindi istälekle, küñel açu, turistlar yöri- yäşi torğan urın bar, barsında küzdän kiçerep üttelär. Qazan çitendäge “Zäñgär kül”, “Aqqoş küle” tirälären üzgärtep, ul küllärgä turistlarnı aqça tülätep kertergä uylıylar. Turistik şirkät wäkilläre söyläşep tuyğaç, matur ğına itep inomarkalarına utırdılar da vıyjıyldatıyp qına törlese-törle yaqqa taralıştılar…
Röstäm İsxaqi
