Казан (Идел буе) федераль университетына Николай Лобачевский исемен бирергә мөмкиннәр. Берәүләр моны университет тарихында зур роль уйнаган галимнең исемен мәңгеләштерү дип кабул итсә, икенчеләре, яңа җитәкчелек шул рәвешле тарихка кереп калырга тели, дип аңлата. Шунысы кызык, Түбән Новгород университеты да Лобачевский исемен йөртә.
Татарстан гына түгел, дәрәҗәсе буенча Идел буе федераль округының да төп уку йортына әверелгән вузга Николай Лобачевский исеме бирелергә мөмкин икәне КФУга баш федераль инспектор Рөстәм Идрисов килгәч билгеле булды. Ул бу фикерне якларга вәгъдә биргән.
Университеттагылар исә әлеге мәсьәләдә артыгын сөйләргә ашыкмый. “Алдан ук шуны белгертәсебез килә: университетка Лобачевский исемен бирү фикерен вуз башлыклары түгел, ә бездәге тарих музее җитәкчесе Стелла Писарева җиткерде. Бу аның шәхси тәкъдиме. Федераль инспектор исә аны яклап чыкты. Ә менә ректор Илшат Гафуровның бу уңайдан нәрсә уйлавын әйтә алмыйбыз. Әлегә кадәр университетка теге яки бу кешенең исемен бирү мәсьәләсе күтәрелмәгән иде”, – диделәр вузда.
Ә менә җәмәгатьчелек бу мәсьәләдә төрле фикерләр җиткерә. Берәүләр әйтүенчә, университетка Лобачевский исемен биреп вузның яңа җитәкчелеге тарихка кереп калырга ниятли. Ләкин бу фикер белән килешеп бетеп булмый. Чөнки университетта еллар узгач та искә алырлык вакыйгалар болай да күп булды инде. Казан дәүләт университеты хәзер федераль дәрәҗәдәге уку йорты санала. Аның структурасында шау-шу китереп чыгарган үзгәрешләрне дә бик озак искә алачаклар әле. Коммунистлар исә вузга Лобачевский исеме бирелүне Ленинны оныттыру, тарихны юкка чыгару дип бәяли. Монысы да бәхәсле. Чөнки Казан университеты исеменнән Ленинны инде ике ел элек үк алдылар. Ә төп бинаның өске өлешендәге язуларны узган елның ноябрь аенда алмаштырдылар. Дөрес, 1973 елның 23 октябрендә тапшырылган Ленин орденына тимәделәр. Пролетариат юлбашчысына төп бина каршысында куелган һәйкәл дә үз урынында.
Илнар Хөснуллин
"Ватаным Татарстан"
20.01.2012 №9-10