Башкортстан башлыгы Рөстәм Хәмитов Белем көне уңаеннан укытучыларны, укучыларны һәм аларның ата-аналарын котлады. Башкортстан мәгариф министрлыгыннан алынган мәгълүматларга күрә, быел республиканың берничә районында яңа мәктәпләр сафка баскан. Шулай ук искереп барган байтак мәктәпләр матур итеп төзекләндерелгән.
Башкортстандагы өч татар гимназиясенең икесе Уфада һәм иң данлыклысы Бәләбәй шәһәрендә. Алар да яңа уку елына җентекле әзерләнгән. Җәйге каникуллар чорында төзәтү, буяу эшләре өчен акчалар җитәрлек бүленгән, моны гимназияләр директорлары да раслый.
Уфаның берничә мәктәбендә татар телен укытуга зур игътибар бирелә. 45нче санлы мәктәп шулар исәбендә. Әлеге белем йорты ЮНЕСКО оешмасы исемлегендә. Балаларның сәләтләрен үстерү өчен байтак түгәрәкләр дә эшли, өстәмә дәресләр дә үткәрелә. Мәктәп мөдире Раил Рамазанов әйтүенчә быел беренче сыйныфка 170 бала килгән.
Тантаналы линейкадан соң, балаларны кыңгырау үз сыйныфларына чакыра. Укучылар быелгы Белем көнен тынычлык дәресеннән башлады.
* * * *
Ул арада безнең Уфадагы хәбәрчебез хәбәр итүенчә, Белем көнендә Уфада балалар бакчасына түләү хакын арттырганнар. Бүгеннән шулай ук Уфада башлангыч класс укучыларына бушлай сөт таратылмаячак. Башкала шурасы шундый карарга килгән.
Your browser doesn’t support HTML5
Белем көнендә Уфада балалар бакчасына түләүне арттырдылар