Казанда "Одиссея: Рәдиф Гаташ диңгезләренә сәяхәт" тамашасы узды

Your browser doesn’t support HTML5

Казанда "Одиссея: Рәдиф Гаташ диңгезләренә сәяхәт" тамашасы

21 апрель Камал театрының кече сәхнәсендә "Одиссея: Рәдиф Гаташ диңгезләренә сәяхәт" исемле шигъри-музыкаль спектакль узды. Аны "Калеб" яңа буын җыены әзерләде.

Оештыручылар әйтүенчә, бу юбилей кичәсе түгел, шигърият бәйрәме. Сәхнәдә поэзия, музыка һәм яшьләр бергә тупланды. Сценарий авторы – Луиза Янсуар һәм Йолдыз Миңнуллина, режиссеры – Резеда Гарипова. Оештыручылар әлеге тамаша ярдәмендә Рәдиф Гаташ шигъриятендәге төп лейтмотивны – адәм баласының туганнан башлап гомер буена дәвам иткән сәяхәте – Одиссеясын чагылдырырга тели.

"Одиссея" спектакле шигърият һәм музыканың синтезы формасында бара. Төп каһарманнар – Артем Пискунов, Зөлфәт Закиров, Резедә Сәләхова, Илфак Хафизов. Алар Гаташ поэзиясен яңгыраттылар.

Спектакльнең тагын бер үзенчәлеге: Рәдиф Гаташ сүзләренә язылган ретро җырларның яшь музыкантлар һәм җырчылар тарафыннан яңача, заманча башкарылуы. Көйләрне Juna төркеме, Эльмир Низамов, Алмаз Ахунов башкарды.