Сәнгать фестивале Русиянең ЮНЕСКО эшләре буенча комиссиясе һәм Башкортстан мәдәният министрлыгы башлангычында оештырыла. Бәйрәмнең беренче көне иртәнге яктан ук түгәрәк өстәл сөйләшүе һәм сәхнәне яктырту дизайны нигезләре турында осталык дәресләре белән башланып китте. Ә кичен Конгресс-холл янындагы амфитеатрда “Симфоник төн” тамашасы булып узды. Чирәм белән капланган калкулык итәкләрендә меңнәрчә тамашачы урын алды. Республиканың Яшьләр симфоник оркестры дөнья, Русия һәм Башкортстан классик музыкасы әсәрләрен башкарды. Искитмәле матур тамаша озакка сузылган фейерверк белән тәмамланды.
Your browser doesn’t support HTML5
Уфада Симфония төненә 20 меңләп кеше килгән
“Евразия йөрәге” бәйрәме тагын дүрт көн дәвам итәчәк. 26 май көнне ул кино сәнгатенә багышлана. Амфитеатрдагы зур экранда тамашачыларга нәфис, документаль һәм анимация фильмнары тәкъдим ителәчәк. Башкортстан киностудиясе мөдире Азамат Хуҗахмәтов әйтүенчә, кино тамашалары һәртөрле зәвыкка туры килерлек итеп сайланган.
Алдагы көннәрдә “Евразия киңлегендә мәдәниятара диалог” исемле гыйльми-гамәли конференция дә оештырыла. Ә фестивальне атна азагында “Урал моңы” халыкара сәнгать бәйгесе һәм аның җиңүчеләренең Гала-концерты тәмамлый.