Бөтендөнья конгрессының Милли шурасы башлыгы Васил Шәйхразиев туган телләрне ихтыяри укыту турында канун өлгесен хуплый. Аның сүзләрен "Коммерсантъ" китерә.
"Канун өлгесе әле сөйләшү процессында. Әле кабул ителмәгән. Ошыймы - ошамыймы, без әлегә моның хакта сүз йөртә алмыйбыз. Безнең максат әлеге өлгене расларга", диде ул.
Аның сүзләренчә, Бөтендөнья татар конгрессы туган һәм дәүләт телләрен ата-аналар сайлавы белән өйрәнүгә каршы чыкмый. "Безнең эшебез - ата-аналар, әби-бабайлар белән эшләү. Алар балаларын милли сыйныфларга бирсеннәр", диде Шәйхразиев.
Баланы татар сыйныфына бирүдә авырлык туа икән, Шәйхразиев прокуратурага мөрәҗәгать итәргә киңәш итте. Шул очракта прокуратура протест белдерәчәк, ата-ана хокукы тормышка ашачак, дип саный ул.
Татар конгрессы башкарма комитеты рәисе Ринат Закиров реакциянең канун кабул ителгәннән соң булачагын белдерде.