Моның өчен сайт Татарстан белән бәйле яки татар телендә булырга, тауар яки хезмәтләр сату белән шөгыльләнмәскә тиеш.
Төбәк домены координация үзәге REG.RU аккредитацияләнгән теркәү оешмасы белән берлектә .tatar домен зонасында 100 яңа сайтны бушлай теркәячәк. Бу хакта Татарстан мәгълүматлаштыру һәм элемтә министрлыгының матбугат хезмәте хәбәр итә.
Министрлыкта искәртүләренчә, доменны бушлай алу өчен берничә шарт үтәлергә тиеш:
- Проект Татарстанга бәйле яки татар телендә контент тәкъдим итәргә тиеш.
- Сайт тауар яки хезмәтләр сату белән бәйле сәүдә юнәлешле булмаска тиеш.
- Интернет-ресурс доменны теркәгән һәм хостингны алган вакыттан алып 3 айдан да соңга калмыйча эшли башларга тиеш.
.tatar доменлы сайт теркәү өчен 31 мартка кадәр REG.RU сайтында авторизация һәм теркәлү узарга, .tatar зонасында моңа кадәр алынмаган домен сайларга һәм заказ бирергә кирәк диелә министрлык хәбәрендә.
Хәзерге вакытта .tatar зонасында республика, Русия оешмаларының, халыкара ширкәтләрнең 1 меңнән артык домен атамасы теркәлгән.
.tatar домены 2014 елда эшли башлады. Әлеге проект 185 мең долларга төшкән диелде.