Татарстан президенты республикада барлык ватандашлар өчен "үзизоляция" режимын кертте. Бу хакта Татарстан вице-премьеры Ләйлә Фазлыева белдерде.
30 марттан Татарстанда барлык ватандашларга "үзизоляция" урыннарында гына булу теләп ителә. Урамнарга бары тик ихтыяҗ булу очрагында гына чыгарга рөхсәт ителә. "Үзизоляцияләү урыныннан чыгу - COVID-19 таралуына бәйле махсус режимны бозуны аңлата", дип белдерде Фазлыева.
Урамга нинди очракларда чыгарга мөмкин дигән карар якын көннәрдә игълан ителәчәк. Урамга чыгу өчен махсус "белешмә" кирәк булачак, диде Татарстан вице-премьеры. Сәбәпсез чыккан кешеләргә штрафлар салыначак.
Аеруча 65 яшьтән олырак кешеләргә өйдән чыкмау әһәмияте әйтелде. "Үзизоляция тәртибен бозмавыгызны һәм ашыгыч ярдәм кирәк булган очраклардан тыш, өйләрегездән чыкмавыгызны сорыйм", диде Фазлыева.
Моннан тыш республикада шәһәрләр арасында җәмәгать транспорты йөреше дә туктатыла.
БУ ТЕМАГА: Коронавирус. Җанлы блог [зәхмәт таралу көндәлеге]
- Бүгенге көндә рәсмиләр Татарстанда 14 кеше коронавирус йоктырганын әйтә, соңгы ике тәүлектә яңа авырулар турында хәбәр ителмәде. Башкортстанда исә 29 мартта вирус йоккан биш кеше ачыкланды дип хәбәр ителә.
- 30 март көненә Русиядә бүгенге көндә коронавирус йоктыруның 302 яңа очрагы ачыкланган. Русиядә авыручыларның гомум саны 1836га җиткән. Авыру илнең 71 төбәгендә таралган. Дөньяда яңа вирус йоктыручылар саны 730 меңнән арткан. 35 меңгә якын кеше үлгән.
- 30 марттан карантин чарасы Мәскәүдә һәм Мәскәү өлкәсендә кертелде. Кирәксезгә урамга чыгу тыелды. Русия премьер-министры Михаил Мишустин Мәскәүдә кертелгән карантин режимын ил күләмендә кертергә тәкъдим итте.
Коронавирус. 29 март 2020
| төбәкләр | авырган | үлгән | терелгән |
| Татарстан | 14 | 0 | 1 |
| Башкортстан | 5 | 0 | 0 |
| Русия | 1836 | 9 | 66 |