Bu könnärdä Qazanda “Rusiä islam mirası” xäräkäte prezidiumı äğzası, Rusiä möselman jurnalistları berlege räise Vyaçeslav Ali Polosin bulıp kitte. Rusiä Däwlät Dumasınıñ elekkege deputatı, qayçandır ber urıs çirkäwendä ataqay – pop bulıp torğan Vyaçeslav Polosin İslam dinen qabul itep böten dönyanı şaqqatırğan ide. Xäzer ul Rusiä Möftilär Şurası räise kiñäşçese wazıyfasın başqara. Soñğı waqıtta İslam teması buyınça küp kenä kitaplar da çığardı. Vyaçeslav Ali Polosinnıñ Qazanğa kilüe möselmannar öçen zur waqiğa buldı dip äytergä mömkin. Kilüeneñ berençe könendä Polosin “Möselmannar añlawında İncil” kitabın täqdim itte. Polosin çit ildäge missionerlar tarafınnan törle milli tellärdä çıqqan häm xalıqqa buşlay taratılğan “İncil” kitapları qurqınıç uyata döres bulmağan qaraş tudıra dip sanıy. Anıñ kitabı açıqlıq kertü öçen yazılğanın bilgeli. Bu xaqta ul sişämbe könne Tatarstan Diniä näzarätendä uzğan möselman jurnalistları belän oçraşu waqıtında äytte.
Şul uq oçraşuda Vyaçeslav Ali Polosin
Zıyalı möselmannarnı tärbiäläw kiräklegenä basım yasadı. Här närsägä möselmannarnıñ üz qaraşı bulırğa tieşlegen assızıqladı. Televideniedä barğan tapşırularğa, prokattağı fil''mnarğa häm yaña çıqqan kitaplarğa qarata möselmannar üz fikeren buldırırğa - alar xaqında yazarğa, massaküläm mäğlümat çaralarına citkerergä tieşlär . Barı şul çaqta ğına möselman elitası –möselman zıyalıları barlığı turında äytergä bula. Şul möselman zıyalılar fikerenä kiläçäktä qalğan möselmannar da quşılaçaq. Şuña berençe çiratta möselman zıyalıların buldırırğa kiräk.
Rusiä möselmannar jurnalistları berlege räise bularaq Vyaçeslav Ali Polosin xäzer çığuçı möselman gazetaları qanäğätlänerlek bulmawın äytte. Barı internetta ğına möselmannar turında kiñ qaraş uyata torğan mäğlümatlar birelüen assızıqladı.
Sişämbe könne Tatarstan möselman jurnalistları berlege dä oyıştı. Bu xaqta “Möslimä” gazetası baş möxärrire Älmirä Ädiätullina
Bez İslamnı pıçratuçılarğa xaq itep cawap birä torğan jurnalistlar tärbiälärgä tieş. Bu berlek şunıñ belän şöğellänäçäk.Tatarstan möselman jurnalistları berlegen oyıştıru turında küptännän söylänep kilde. Älege berlekne barlıq Rusiä töbäklärendä dä tözü küzdä totıla. Vyaçeslav Ali Polosin kiläçäktä möselman jurnalistları assotsiatsiäsen buldırırğa uylıy. Ä Tatarstanda oyışqan möselman berlege üz aldına nindi maqsatlar quya soñ. Bu xaqta Ğamil Ğibadullin
Tatarstan möselman jurnalistları professional''lege yuğarı bulırğa tieş. Bergä aralaşıp, fiker alışırğa tieşlär.
Landış Xarrasova.