15 fevral’dä 17 yıl elek şuşı könne Äfğanstannan sovet ğäskärlären çığaru tämamlanğan. Çärşämbedä başqalada urnaşqan älege suğışta häläk buluçılarğa häykäl yanında istälek mitingı ütte. Anda ällä ni küp keşe bulmadı, çarağa nigezdä häläk buluçılarnıñ yaqınnarı kilde. Äfğanstandağı suğışta Tatarstannan 9 meñnän artıq keşe qatnaşıp, şularnıñ 300gä yaqını häläk buldı. Älege qorbannar nigä kiräk ide, yäş yegetlär bu suğışta närsä öçen ülde. Bu sorawğa cawapnı qazanlılar äytte:
- Minemçä Sovet armiäsen Äfğanğa kertü, ğomumän döres äyber tügel. Çönki anda bik küp yäşlär ülgän häm xäzerge waqıtta alarnı zurlaw, alarnı xörmät itü digän äyber bötenläy yuq. Çönki ul yäş buında çağılır ide. Alar da Böyek Мatan suğışı batırları kebek ük alar da batırlar, alarnı da zurlasınnar, xörmät itsennär ide.
Kiräk tügel ide bu suğış, çönki bik küp keşe tik torğanda üldelär.
Nindi genä suğış bulmasın, ul köç qullanuğa qaytıp qala. Häm şunı äytäsem kilä, Äfğannan qaytqan keşelär belän söyläşkännän soñ şunı añlıysıñ: alar üzläre ni öçen suğışqannarın belmägännär, alarğa barı tik şulay quşılğan ğına bulğan.
Äfğanstanğa kerü ul Sovetlar Soyuzınıñ bik zur yalğışlığı ide. Ul zamanda uq anı ber keşe dä xuplamadı, läkin mäcbürlär bardılar. Küpme keşe ülde, qaytqannarı da äybätläp yäşi almadı. Häm xäzer dä şunıñ afätlären kürep yäşilär. Min monı qabat qabatlanırğa tieş bulmağan bik zur yalğış dip sanıym.
Anda bit 17 meñ keşe wafat buldı. Yarar inde xäzer inde 17 yıl ütkäç, Rusiä Prezidentı alarnı iskä ala başladı. Alarnı hiç onıtırğa yaramıy, ägär bez alarnı onıtsaq, bezneñ ilebezdä xalıq böten närsäne onıtaçaq.
Gölnaz Şäyxetdin