Xalıqara teatr könenä bağışlanğan kiçäneñ berençe öleşe Tatarstannıñ atqazanğan artistı Moxtar Mutinnıñ tuuına 120 yıl, Tatarstannıñ häm Rusiäneñ xalıq artistkası Ğaliä Bulatova, Tatarstannıñ xalıq artistkaları Ğaliä Kaybitskaya, Ğaliä Niğmätullinalarnıñ tuuına 100 yıl tuluğa häm Tatarstannıñ xalıq, Rusiäneñ atqazanğan artistkası Şäxsänäm Äsfändiärovanıñ tuuına 80 yıl tuluğa bağışlanğan ide. Kiçäneñ ikençe öleşendä öçençe tapqır ütkärelüçe "Yaña tatar p'yesası-2005" bäygesendä ciñüçelärne büläkläw tantanası uzdı. Bäyge bügenge kön tatar dramaturgiäsen populyarlaştıru häm aña yaña avtorlar cälep itü, şulay uq yaña dramaturgiä äsärläre ezläw häm tatar teatrları öçen p'yesalar cıyılmasın tulılandıru maqsatınnan oyıştırılıp kilä. Başqa yıllardan ayırmalı bularaq, bıyıl bäyge "İñ yaxşı komediä" häm "İñ yaxşı muzıkal' p'yessa" nominatsiälärendä ütte. Bäygeneñ öçençe öleşenä saylap alınğan 10 p'yessa arasınnan jyuri, “İñ yaxşı komediä” nominatsiäsendä Baydi onığı iseme astında – dramaturg Tufan Miñnullinnıñ “Altı qızğa ber kiäw” p'yesasın iñ yaxşısı dip taptı. İkençe urın “Baqça qaraçqıları” äsäre öçen Qarlığaç psevdonimlı – Zöläyxa Minhacevağa birelde. Öçençe urınnı isä tağın ber qat dramaturg Tufan Miñnullin aldı. Läkin bu yulı ul “Sin mine küräseñme?” p'yesasınıñ avtorı itep Läysän İbätullinanı kürsätkän. Avtor säxnägä çaqırılğaç, Tufan Miñnullin da anıñ belän bergä çığıp serne açtı. “İñ yaxşı drama äsäre” nominatsiäsendä bilgesez avtornıñ “Legioner” p'yesası berençe urınğa layıq dip tabıldı. Bu äsärneñ Sarı qoş quşamatlı avtornıñ çın iseme yabıq konvertqa salınmağan bulıp çıqtı. Sarı qoşnıñ äsäre berençe urınğa çığuı turında iğlan itelgäç t” avtor, säxnägä çıqmadı, İkençe urın Äkiätçe quşamatlı – Esfir Yähüdinneñ “Oluğ xannıñ färmanı” p'yesasına häm öçençe urın Kentavr – Flera Tarxanovanıñ “Söyü ğazabı, yäki taşlama mine” p'yesasına birelde. Şulay uq, Zig-zağ İlgiz Zäynievneñ “Küklär yılmayıp qarasa”, “Caysız keşe” iseme astındağı “Alma baqçasında altın bar” p'yessasınıñ avtorı bilgesez qaldı, Yoldıznamä - Xäbir İbrahimovnıñ “Näfiğa xanım” äsäre häm Möxämmät psevdonimı astında El'mira Şärifullinanıñ “Ğömer ber genä” p'yesaları bäygeneñ qızıqsındıru premiäsenä layıq buldı. Barlıq büläklänüçelärgä dä Qazan küreneşe häm teatr suräte töşerelgän maxsus medal' häm istälekle büläklär tapşırıldı. Ä ike nominatsiädä dä berençe urınğa – 100 meñ, ikençe urınğa – 75 häm öçençe urınğa layıq buluçığa 50 meñ sum premiä tapşırıldı. Şulay kiçä soñında “Ädäbiät häm sänğät yılı” qısalarında, Tatar teatr sänğäteneñ 100 yıllığı uñayınnan, dramaturgiä ölkäsendä çirattağı “Yaña tatar p'yesası” premiäsenä bäyge iğlan itelde. Bıyılğı konkursnıñ şartlarında bernindi dä çikläwlär yuq, barı tik p'yessa tatar telendä icat itelgän häm ber tapqır da säxnädä quyılmağan bulırğa tieş. P'yesalar konkursqa 2005 yılnıñ 31 dekaberenä qädär qabul itelä häm bäygedä ciñüçelärneñ isemnäre ğädättägeçä xalıqara teatr könendä 2007 yılnıñ 27 martında iğlan iteläçäk. Gölnaz Şäyxetdin
