3 mayda respublika premyer-ministrı Röstäm Miñlexanov citäkçelegendä xalıqnı toraq belän tä'min itügä bağışlanğan cıyılış uzdı. Anda süz ipoteka programması, yäğni kredit alıp fatirlı bulu xaqında da bardı. Cıyılıştan soñ Miñlexanov Rusiäneñ ipoteka-toraq kreditlar buyınça däwlät agentlığınıñ citäkçese belän oçraştı. Oçraşu waqıtında Mäskäw qunağı Aleksandr Semenyaqa, İdel buyı ölkäläre arasında Tatarstan toraq belän tä'min itü buyınça eşlärdä aldınğılar safında tora, dide. Ul respublikadağı ipoteka agentlığınıñ eşçänlege belän qänäğät buluın belderde. Tatarstan xalqı ipoteka programması xaqında ni uylıy, älege programma buyınça toraq alırğa telime?
Minem anıñ turında işetkänen yuq, küz aldıma da kiterä almıym. Bälki ul tözeleşkä bäyle berär närsäder, tögäl genä äytä almıym.
Ällä närsä belmim bilgele, gäzit – jurnallardan uquım buyınça azraq beläm. Başta tulı bäyäneñ 30 % tüliseñ, ä annarı inde ay sayın 5000 sum tüliseñ. Älbättä min üzem bik teläp ipotekağa fatir alır idem.
Min üzem sotsial' ipotekağa fatir almas idem, çönki anıñ arttırıp tüläwe küp.
Minemçä ipoteka bik yaxşı äyber häm ul keşelärgä tormış mäs’äläsen xäl itärgä xäl yärdäm itä.
Anıñ barlığı turında işetep beläm, läkin anıñ yärdämendä fatir alırğa uylağanım yuq, çönki min bügenge köndä student. Bälki eşli başlağaç alırmın.
Bilgele ipotekağa fatir alıp bula. Anıñ turında keşe arqılı ğına işetkänem genä bar, bik alay neçkäleklären belmim. Artıq qızıqsınğanım da yuq.
Anı ğadi keşe ala almıy. Anı alır öçen zur xezmät xaqı alarğa kiräk. Ägär dä xezmät 15-20 meñ bulsa yarıy äle ul. Ä bolay ul çınğa aşa torğan närsä tügel.
Bik şikle närsä ul. Min ışanıp betmim aña, xäzer böten cirdä aldalıylar, här cirdä yalğan.
Miña ul kiräkmi, min üzem eşlim. Xökümätkä ışanıp qına bulmıy, üzeñä eşlärgä kiräk.
Gölnaz Şäyxetdin