Tatarstanlılar da xäzer bar keşelek belän bergä dönyaküläm çığa torğan fil’mnarnı qarap, kitaplar uqu mömkinlegenä iä. Menä 18 may könne dä Qazanda, bar dönyadağı kebek ük, Kod da Vinçi – Da Vinçi kodı kinofil’mınıñ premyerası ütte. Şähärneñ Magiä kino kinoteatrında bar telägän häm, älbättä inde, bilet alıp ölgergän keşe şuşı äsärne kilep qarıy aldı. Xäyer, bu yulı qarıy almasañ da, aptırarğa kiräkmi. Kod da Vinçinı 19 maydan Qazannıñ barlıq diärlek kinozallarında kürsätelä. Suvar, Magiya kino, Grand Cinema komplekslarında, Organik kinoteatrında älege fil’mnı kön däwamında kürergä mömkin. Kürsätü waqıtına qarap bilet öçen 50 sumnan alıp 250 sumğa qädär tüliseñ dä, böten dönyada şaw-şu tudırğan Kod da Vinçinı qarıysıñ.
Kod da Vinçi fil’mı dönya buylap berençe yal könnärendä ük 224 million sum aqça cıydı. Bu fil’mğa qarşı mönäsäbät kürsätkän din ähelläre, dini keşelärneñ qarşılığına da qaramastan. Rusiädä Kod da Vinçiğa törle mönäsäbät kürsätälär. Pravoslav çirkäw wäkilläre älege fil’mnı kürsätügä qarşı çıqtı. Mäskäwdä xätta Kod da Vinçinıñ premyerası uzğan Puşkinskiy kinoteatrı yanında piket ta ütkärde. Ä menä Rusiäneñ matbuğat häm massaküläm kommunikatsiälär federal’ agentlığı Mixail Seslavinskiy fil’mnı qarşı çıqtı. Kod da Vinçinı kürsätügä islam dine wäkilläre dä qarşı çıqtı. Bu xaqta Rusiä möftilär şurası räise Rawil Ğäynetdin belderde. Ä Tatarstan älege fil’m häm anı kürsätü, kürsätmäw turında ni uylıylar soñ? Tatarstan möftieneñ berençe urınbasarı Wäliulla xäzrät Yaqub Azatlıq radiosına bu xaqta menä närsä dip belderde.
Fil’m tiräsendä nindider ğawğa eşläw, yasalma konflikt çığaru ul reklama, kübräk aqça eşläp alu öçen eşlänelä. Şuña da bez, din ähelläre, bu mäs’äläne artıq quyırtıp, dindä aqça eşläwçe kommersantlarnıñ kesälären qalınaytırğa bulışırğa tieş tügelQazannıñ pravoslav yeparxiäsendä dä şundıyraq fikerdä toralar. Bezneñ Kod da Vinçi fil’mına qarata mönäsäbätebez tiskäre, läkin aña tağı da zurraq reklama yasap bez nindi dä bulsa qarşılıq aksiäläre oyıştırırğa cıyınmıybız, dip belderdelär anda azatlıq radiosına.
Xäyer, Tatarstanda älege fil’mnı kürsätä başlaw uñayınnan nindi dä bulsa şaw-şulı çaralar uzmasa da, anı qararğa teläwçelär citärlek. Härxäldä, bez şaltıratıp beleşkän kinoteatrlarda tamaşaçılar citmäwgä zarlanmadılar.
Gölnaz İlgizär