Törkiädä Sabantuy soñğı yıllarda bik zurlap ütkärelä. Tatarstannan da anda şaqtıy däräcäle wäkillär bara, Törkiäneñ üzennän dä zur qunaqlar kilä. Bu yulı da şulay buldı. Qazannan maxsus oçqıç belän İstanbulğa Mädäniät ministrı Zilä Wälieva citäkçelegendäge 130 keşelek räsmi delegatsiä kitte. Sänğät ähelläre, cämäğät eşlekleläre, xökümät wäkillärennän torğan älege delegatsiä millättäşlärebezgä bäyrämne matur itep ütkärergä yärdäm itte, kilgän qunaqlarğa küçtänäçlär dä öläşte. Zilä Wälieva Sabantuyda qatnaşuçı millättäşlärebezne milli bäyräm belän qotladı, Tatarstan prezidentınıñ qotlawların citkerde. Böten dönya tatar kongressı räise Rinat Zakirov üzeneñ çığışında Sabantuy belän genä qotlap qalmadı, ğalim Nadir Däwlätkä Qazannıñ meñyıllığı istälegenä medalen tapşırdı.
Bäyrämgä Törkiäneñ mädäniät häm turizm ministrı Atilla Köç, federal’ arxiv üzäge citäkçese, TÜRKSOY citäkçese urınbasarı Mostafa Balçiq, Rusiäneñ Törkiädäge ilçese Petr Stegniy da kilgän idelär. Qunaqlarğa Sabantuy bik oşağan, alar bäyrämnän bik qänäğät qalğannar. Atilla Köç üzeneñ çığışında, tatar milläten Sabantuysız küz aldına da kiterep bulmıy, bu bäyräm tatarlarnıñ ruxi yaqtan baylığın kürsätä, dip äytkän. Rusiäneñ ilçese Petr Stegniy isä, Sabantuy Törkiä belän Rusiä arasındağı mönäsäbätlärne nığıtu xaqında söyläde.
Tantanalı çığışlardan soñ, cır-biü çiratı citte. Monda da tatarstanlılar sınatmadı. Sabantuyda Tatar däwlät cır häm biü ansamble, Mgnovenie biü törkeme, cırçılar El’mira Kälimullina, El’mira Cihangirova, Vladimir Vasil’ev häm başqalar çığış yasadılar. Rawil Fäyzullin, İlfaq İbrahimov, Rämis Äymät tä bäyräm belän millättäşlärebezne qotladılar.
Gölnaz İlgizär