8 yünnän 11nä qädär Qazanda milli häm töbäk mäğlümät çaraları kongressı uzaçaq. Çaranı Tatarstan xökümäte, Rusiäneñ häm Tatarstannıñ jurnalistlar berlege, Tatmedia agentlığı oyıştıra. Kongress bıyıl inde ikençe märtäbä uza. Berençe kongress 2005 yılda Rusiä Duması belän bergälektä ütkärelgän bulğan. Rusiäneñ 40 töbägennän häm BDB illärennän 250dän artıq jurnalist qatnaştı anda. Cıyında köç qullanu, qansızlıq, räximsezlekkä qarşı teletapşıruçılar Xartiäse, Duma deputatlarına möräcäğät qabul itelde. Bıyılğı kongress turında tulıraq mäğlümätne isä bezgä Tatmedia agentlığınıñ mäğlümät-analitika bülege belgeçe Alsu Ğabdraxmanova birde.
Kongressnıñ töp maqsatları – Rusiädä häm BDB illärendä milli häm töbäk mäğlümät çaralarınıñ bügenge torışı häm üseş perspektivaları turında fiker alışu, täcribä urtaqlaşu. Cıyında qatnaşuçılar arasında Rusiäneñ 40tan artıq töbägennän häm Ukraina, Äcerbäycan, Üzbäkstannan, Tacikstannan da mäğlümät çaraları, mäğlümät agentlıqları, mediaxoldinglar wäkilläre, jurnalistlar qatnaşır dip kötelä.
8 yündä başlanıp kitäçäk çaranı açu tantanasınnan tış, pänceşämbe könne kongress qunaqları Qazan belän dä tanışaçaq. Kiçen çarada qatnaşuçılar köymägä utırıp Qazannan Alabuğağa kitäçäklär. Küpsanlı qızıqlı oçraşular, täcribäle jurnalistlar belän aralaşular bulaçaq monda. Comğa kiçendä isä qunaqlarnı meñyıllıq Alabuğa belän tanışu, şähär xakimiäte belän oçraşu da kötä. 10 yündä alar Sabantuy bäyrämendä qatnaşaçaq. Kongressnıñ plenar öleşe Qazan milli-mädäni üzägendä uzaçaq. Annarı qunaqlar Fedor Şalyapin köymäsendä Alabuğağa yul totaçaq. Yulda alar öçen qızıqlı oçraşular, täcribäle jurnalistlar belän aralaşu oyıştırılaçaqMilli häm töbäk mäğlümät çaraları kongressnıñ bıyıl tağın ber üzençälege bar. Kongress qısalarında Küpqırlı Rusiä digän bäygeneñ näticäläre dä yasalaçaq.
Gölnaz İlgizär