İkençe Bötendönya tatar yäşläre forumı üz eşen yomğaqlap kilä. Comğa könne delegatlar “Aq bars” yäşlär üzägendä yañadan plenar cıyılışqa cıyıldı.
Cıyılıştı Samara ölkäse wäkile, yäşlär xäräkätendä küptännän bilgele Färxät Mäxmütov, Finländiä yegete Xämit Sämärxan, Başqortstan tatar yäşläre xäräkätendä küptän qatnaşuçı, jurnalist Rimma Bikmöxämmätova şaqtıy üzençälekle çığış yasadılar.
Rimma Bikmöxämmätovanıñ bu çığışı delegatlarda bigräk tä köçle tä'sir yasadı. Çönki forumnıñ berençe könendä mönbärgä kütärelgän Başqortstan wäkilneñ çığışı bezdä barısı da al da göl, problemalar yuq digän tä'sir qaldırğan ide. Al'ternativ süzne alğan Rimma Bikmöxämmätova Başqortstan xakimiäten tänqitlämäsä dä, şaqtıy citdi fikerlär äytte. Anıñ yaqtaşı Zäliä Axunova Rimmağa qarşı zaldağı mikrofonnan bäxäs qorırğa omtılsa da, diskussiä alıp barırğa säbäp yuq ide. Äytelgän öç çığış yasawçıdan soñ, pänceşämbe könne ütkän seksiä utırışları turında xisap belän Rezeda Safiullina, İl'şat Saitov, Rafik Möxämmätşin, Damir İsxakov, Färit Urazaev, Miläwşä Ğayfullina çıqtılar. Här seksiädä 100 gä yaqın keşe qatnaşıp, bäxäsle çığışlar yasağannar, distälägän täqdimnär kertkännär. Şuşı yözlägän täqdimnärne tormışqa aşıru öçen alarnı tärtipkä kiterep, bastırıp çığaru belän şöğellänergä tieşle redaksiä Şurası buldırıldı. Forumnıñ ğomumi rezolyutsiä proyektı belän kongress başqarma komitetı räise urınbasarı Rinat Väliullin çıqtı. Bu rezolyutsiädä şaqtıy qatlawlı häm konkret eşlär, täqdimnär, yünäleşlär bilgelängän.
Rezalyutsiä ber tawıştan qabul itelde, ä annan soñ qararlarnı tormışqa aşıru häm ağımdağı eşlärne oyıştıru öçen yaña byuro äğzaları saylandı. Bu isemlekkä 19 nämzät täqdim itelde, berkem töşerelep tä qaldırılmadı da, östälmäde dä. Här nämzätneñ kem buluı, närsä eşläwe turında tulı mäğlümat birelde.Tawış birü demokratik şartçalarda ütte. Qayberäwlär ber tawıştan saylandı, ä üz fikerläre, ğämälläre belän bilgele şäxeslärgä berniçä keşe qarşı tawış birde, yäki 10-20 bitaraf tawış birüçelär dä tabıldı.
Byuroğa saylanğan 19 yeget häm qıznıñ 11 - Tatarstannan, 5се – Rusiä töbäklärennän häm 3 se yıraq çit illärdän. Menä alarnıñ isemnäre: Finländiädän Xämit Sämärxan, Äzerbäycannan Dias Äxmätcanov, Qazaqstannan Cälil Axuncanov, Mäskäwdän Lenar Raxmanov, Radik Yärullin Samaradan Färxät Mäxmütov, Udmurtiädän Zöhrä Kasıymova, Başqortstannan Läysän Ömetbayıwa, Tatarstannıñ Minzälä rayonınnan Aygöl Mannapova, Çallıdan İlüzä Zinnurova, Qazannan Ruslan Sabirov, Ruslan Aysin, Gölnara Sabirova, Rail Ömetbaev, Miläwşä Şarapova, İlşat Säetov, Bötendönya tatar kongressı Başqarma komitetınıñ yäşlär belän eşläw bülege referentı Mönirä Säğidullina, Tatarstan tarix institutı xezmätkäre Rezeda Safiullina, “İrek mäydanı” gazetası xezmätkäre Rimma Bikmöxämmätova kerde. Bötendönya tatar kongressı Başqarma komitetı räise Rinat Zakirov byuroğa yäşlärneñ barlıq qatlamnarın da kertergä tırışqanlığın äytte. Byuro äğzaları saylanğannan soñ alar bergä cıyılıp yabıq işeklär artında yaña citäkçene häm anıñ urınbasarın sayladı. Tatar yäşläre forumı räise itep “Molodej' Tatarstana” gazetası jurnalistı, säyäsät fännäre kandidatı İlşat Säetov saylandı. Ä anıñ urınbasarları wazifasına Tatarstan Yäşlär eşläre, sport häm turizm ministrlığı qarşındağı “İdel” yäşlär üzäge citäkçese Miläwşä Şarapova häm Samara tatarları wäkile Färxät Mäxmütov täğäyenländelär. Şunıñ belän forum tämamlandı, delegatlar Qazan buylap häm Qırlay awılına ekskursiägä kittelär. Şimbä könne delegatlar Tatarstan başqalasında ütkärelä torğan Saban tuyında qatnaşaçaq. Gölnaz Şäyxetdin