Sişämbedä Rusiä Däwlät Dumasına ber qanun proyektı täqdim itelde. Monısı Reklama häm massaküläm matbuğat xaqındağı qanunnarğa üzgäreşlär kertü turında. Qanun proyektı avtorları fikerençä, Rusiädä seks turında artıq küp äyber kürsätelä, söylänelä. Telefon aşa seks, böten xalıq qarıy torğan telekanallarda seks wä erotika häm başqalar. Citte diärgä telilär qanun proyektı avtorları. Qanun qabul itelgän oçraqta, ğomum telekanallarda erotik tapşırular azayaçaq, gäzitlärdä dä. Qazan xalqınıñ bu qanun proyektına qarata fikerläre.
Bilgele mondıy qanun küptän kiräk ide. Ämma bu qanun belän genä töptän qorılğan xalıqnı azdıru säyäsäten tuqtatıp bulır mikän soñ? Bu häläkätkä qarşı torırday äyber – ul bezneñ din.
İntim äyberlärne äzräk kürsätsennär ide. Bez möselman bulğaç bu bezgä çit häm yat. Yegetlär ul turıda söylägändä miña bik çiten häm oyat bula.
Yäşlär küräse kilgänne taba. Televizorda bulmasa, barıp çişenderep qarıy. Qanun belän genä tıyıp bulmıy andıy närsäne, tärbiä kiräk. İñ äybäte televizor qaramasqa, ä mäçetlärgä yörergä kiräk.
Bu intim mäs’älälärne qarağanda barsın da tıyarğa kiräk. Yarar bez olılarnı ul bozıqlıqqa iltmi, bez anıñ turında barsın da beläbez. Ä balalarnı xäzer televizor qarşına utırtıp bulmıy, çönki anda bozıqlıq bik küp. Balalarğa ata-analar üzläre añlatırğa tieşlär. Ä inde televizordan qarağanda andağı bozıqlılıq bik nıq tä'sir itä, alarnıñ fikerlären ber dä yaxşı yaqqa yünältmi.
Min bu qararnı xuplıym. Çönki andıy intim reklamnar bik nıq kübäyep kitte.
Älbättä andıy qanun kiräk. Çönki bu bügenge yäşlärgä bik nıq naçar tä'sir itä. Min üzem andıy oçraqlarda andıy tapşırularnı qaramasqa tırışam. Häm başqalarğa şulay eşlärgä täqdim itäm.
Min üzem andıy tapşırular kiräk dip sanıym. Çönki qayber keşe üzeneñ tabiğätennän bik tıynaq bula. Häm andıy irlär belän xatın – qızlar bik nıq ğazaplana. İr keşe inde anıñ teläklären añlamıy. Şunlıqtan censi tormışta añlaşılmawçanlıq, üzenä kiräk qädär läzzät almağanlıqtan küp ğailälär cimerelä dip uylıym min. Şunıñ öçen bu tapşırularnıñ waqıtı soñraq quyılsa häm telägän keşe mondıy tapşırularnı qarıy alsa, minemçä monıñ faydası bulır.
Gölnaz Şäyxetdin