Bu könnärdä Sverdlovski ölkäseneñ Ärtä rayonı, Äceğol awılı klubında tatar xatını Ğaliä apa Zäynullinanı xörmätläw kiçäse bulıp uzdı. Kiçä Ğaliä apanıñ altmış yıllıq yubileyına bağışlandı.
Ural tawlarınıñ iñ matur qoçağına sıyınıp utırğan, iseme cırlarğa kergän Äceğolda tuıp üskän Ğaliä apa böten ğömeren, böten tırışlığın awılına, awıldaşlarına bağışlağan. Xezmät yulı monnan qırıq dürt yıl elek awıldağı balalar yortında başlanıp kitkän anıñ. Tınğı belmäs citez, qıyu qız bularaq, yäşlek yılları komsomol tormışı belän qaynap ütkän. Tärbiäçe, uqıtuçı bulıp eşläwe küp waqıtın alsa da, awıl mädäniät uçağın sündermi totuçı keşelärneñ berse bulğan ul.
İnde yegerme biş yıldan artıq Ğaliä Zäynullina “Kübäläk” balalar fol'klor ansamblen citäkläp, berniçä buın balalarnı tatar mädäniäte, tatar sänğäte ruxında tärbiäläp çığardı. “Kübäläk”lär ölkä külämendä uzdırılğan festival'lärdä ciñep, iñ berençe urınnarnı alıp kilälär, alarnıñ çığışın xalıq härwaqıt soqlanıp, yaratıp qarşı ala. İreşkän uñışları öçen bu yıl “Kübäläk” fol'klor balalar ansamblenä Sverdlovski ölkäse mädäniät ministrı boyırığı belän “ürnäk ansambl'” iseme birelde.
Awıldaşları bik yaratalar, xörmät itälär Ğaliä xanımnı. Alar söyläwençä, olını olı itä, keçene keçe itä belä torğan Ğaliä xanım bik yärdämçel, eçkersez küñelle, uñğan keşe. Berdänber ulı häläk bulıp, tormışta bik zur sınawlar kiçersä dä, küñel köçen sındırmağan. Üze äytüençä, keşelärgä yärdäm itep, awıldaşları öçen yäşäp tormıştan täm taba ul.
Ğaliä Zäynullinanı ğömer bäyräme belän qotlarğa dip Yekaterinburg şähärennän kilgän Milli media-xolding citäkçeläre, deputat yärdämçeläre, Ärtä rayonı xakimiäte wäkilläre, rayon üzägennän, kürşe rus häm mari awıllarınnan kilgän komsomol yäşlege dusları häm başqa yaqınnarı, awıldaşları cıyıldı. Küñelennän taşığan xislär dulqınına tüzmiçä, Ğaliä xanım qunaqlarğa möräcäğät itte.
- “Min sezneñ barığıznı da bik yaratam, - dide ul, - bez tatarlar, bezne biredä xörmät itälär, ruslar da, marilar da, başqalar da. Şulay däräcäbezne töşermi, çın tatar yözen saqlap, millätebezne yuğaltmıyça, berdäm, dus bulıp yäşik”.
Ğadi awıl xatınınıñ çın yöräktän çıqqan bu süzläre tatar milläte öçen ğorurlıq ta, dus yäşärgä öndäw dä bulıp yañğıradı. Yubiley kiçäse çın-çınlap xörmätläw kiçäse bulıp uzdı.
Fäwiä Safiullina, Yekaterinburg