Soñğı waqıtta, “Azatlıq” radiosı tıñlawçıları Qazan byurosına yış şaltırata. Alarnı, bu könnärdä “Azatlıq” radiosı “Yaña ğasır” dulqınnarında işetelmäw borçıy. Qazan cämäğätçelege arasında “Azatlıq” nı yapqannarmı ällä digän şik-şöbhä dä taraldı. Bu süz taraluğa, bu könnärdä matbuğat çaralarında basılğan ber xäbär säbäp buldı. Qayber gäzitlär, urıs telendäge “Azatlıq” nıñ Rusiäneñ 60 töbägendä retranslyatsiä tuqtatıldı dip yazdılar. Bu xäbär niqädär çınbarlıqqa turı kilä, älegä tögäl bilgele tügel. Ä “Azatlıq” nıñ “Yaña ğasır” aşa retranslyatsiälänüe älegä däwam itä, dip ışandıralar “Yaña ğasır” radiosı xezmätkärläre. Häm bu könnärdä “Azatlıq” nıñ “Yaña ğasır” aşa yañğıramawı - ul texnik säbäplär arqasında bulıp çıqtı. Ä sişämbedä “Azatlıq” nıñ açıq mikrofon säxifäse, menä şundıy radio turında imeş-mimeşlär yörgänlektän, Qazan xalqınnan radiolar turında soraştıru uzdırdı. Qazanda kem nindi radio tıñlıy häm ni öçen?
Minem älläni radiolar tıñlağanım yuq, çönki waqıtım da, öydä radio da yuq. Qayber waqıtta ğına “Na militseyskoy volne” radiosın tıñlıym.
Min kön dä “Azatlıq” radiosın tıñlıym, çönki anda härwaqıt operativ häm obyektiv informatsiä birelä. Böten xäbärlärne törle yaqtan yaqtırtıp söylilär.
Min üzem “Yaña ğasır” radiosın tıñlıym. Çönki äti belän äni bik küptännän öyrängän irtän tatarça radio tıñlap, alar tıñlağaç mina alar belän bergä tıñlarğa turı kilä.
Ğädättä min üzem “Yaña ğasır” nı tıñlıym, ä menä kiç belän anda tatarça diskoteka tapşıruı başlanğançı min “Azatlıq” radiosın tıñlıym. Monda böten tatar dönyasınıñ xäbärläre tatar telendä birelep barıla.
Min kübräk “Maksimum” radiosın tıñlıym. Çönki min rok stilendäge cırlar oşıy.
“Azatlıq” nı tıñlıym kübesençä, anda dönyada bulğan barlıq yañalıqlarnı äytälär. Yañalıqlarnı üzeñ genä belep betermiseñ, änä şul “Azatlıq” nı tıñlap bar närsäne dä belep bula.
Eşlägänlektän minem waqıtım bik az, radio tıñlap utırğançı min yoqını qulayraq küräm.
“Azatlıq” radiosın bik qızıqsınıp tıñlıym, çönki törle töbäklärdä nindi xäbärlär buluı turında min şuşı radio aşa işetäm.
Gölnaz Şäyxetdin