Cäy aylarında härkem dä yal itep qalırğa tırışa. Kemder diñgez yarı buyında qızınıp, su kerüne xuplıy, ä kemder üz tuğan yaqlarında yal itüne üz itä. Ä menä Tatarstan Däwlät Şurası deputatı, şağir Robert Miñnullin üzeneñ cäyge yalın Başqortstan respublikası buyınça säyäxättä ütkärgän. İyül ayında ber törkem Tatarstan artist- sänğät'kärläre, tatar cämäğätçelege bergä cıyılıp Başqortstannıñ Aqsäyet awılına yul alğan ide. Älege awıl yazuçılar Ädip Malikov, Kiräy Märgän Rusiäneñ atqazanğan artistı Zinira Atnabayıva, professor Käbir Zakircanov, Salawat Fätxetdinov isemnäre belän bäyle. Yıl başınnan Aqsäyettä mäş kilep yörgän Salawat, säbäben dä añlatıp tormıyça tatar cämäğätçelegen tuğan awılına bäyrämgä cıydı. Ä säbäbe ğadi- awıl başında Salawat yärdäme belän tözekländergän çişmäne açu tantanası. Fätxetdinnär näselenä xörmät yözennän awıl xalqı aña Fätxetdin çişmäse digän isem quşqan. Çişmä yanı xalıq belän şaw-gör kilgän. Şunda uq säxnädä Älfiä Avzalova, Flera Söläymanova, Rafael' İl'yasov, Zölfiä häm Cäwit Şakirovlar, Aydar Galimov, Xämdünä Timerğalieva, Räsim Nizamov, “Karavan – Saray” törkeme xalıqnı moñğa kümde. Tatarstan häm Başqortstan sänğät ähelläreneñ cide säğätlek konsert feyerverk belän tämamlandı. Şunnan Qazannan kilgän qunaqlar kire Tatarstanğa qaytıp kittelär. Ä menä şağir Robert Miñnullin Qazanğa qaytmağan, ä ataqlı tatar yazuçıları, şağirläre, böyek ädiplär yäşägän Başqortstan awılları buyınça säyäxätkä kitkän. Älege säfärdän qaytqaç bez Robert Miñnullinnıñ üze belän söyläştek. Ul menä närsälär söyläde.
“Minem ul yaqlarnı bik küräse kilgän ide, çönki ul yaqlarda tatar tormışı qaynap tora häm alar bik qızıqlı töbäklär. Aqsäyet awılı ul ber Salawat Fätxetdinovnıñ tuğan awılı ğına tügel, ä başqa kürenekle isemnär belän bäylängän. Min inde ber barğaç üzemneñ ostazlarım, uqıtuçılarımnıñ tuğan awıllarında buldım. Min inde ul awıllarnı küptän küräsem kilep yöri idem. Xäzer inde min bardım, tuğan nigezlären kürdem. Bik küñelem buldı, çönki şağirlärneñ tuğan cirläre bik izge cir dip uylıym min. Minem küñeldä härber şağirneñ tuğan cire saqlana. Ägär dä inde baz Tatarstanda şağirlärneñ bik küp häm yış bulsaq, çit cirlärdä tuğan şağirlärneñ tuğan cirläre tora-bara onıtıla. Anda berkem dä barmıy, yörmi, ä awıllar yuqqa çıqqan sıman bu awıllar da bezneñ xäterdän yuılıp bara kebek. Şuña kürä min yalğa çıqqaç, Başqortstanda tuıp üskän üzebezneñ klassik yazuçılarıbıznıñ awılların qarap qaytırğa buldım. Ğailämne aldım da çığıp kittek. Ul kiñleklärdä bezneñ bik kürenekle yazuçılarıbız tuğan awıllar çäçelep yata. Şularnıñ berniçäsendä bulırğa turı kilde miña. Äytik, Mäcit Ğafurinıñ, Ğalimcan İbrahimovnıñ, Därdmänd, Mirsäy Ämir, Zäki Wälidi tuğan awıllarda buldım. Qızğanıç, bezneñ yazuçılarıbız da, şağirlärebez dä, ğomumän Tatarstannan bu awıllarda bik siräk bulalar. Äytik, Cirgändä mäsälän Därdmänd turında bötenläy diärlek belmilär. Döres, anda Mirsäy Ämir uramı bar, matur. Läkin awılnıñ kitapxanäsenä kergäç, şaqqattım. Anda ul yazuçılarnıñ kitapları da yuq. Ğomumän, isemnären genä işetep belälär. Şuña kürä barırğa kiräk, kürergä kiräk ikän. Härxäldä ul awıllar bezneñ onıtılmasqa tieş.”Şulay itep Tatarstannıñ xalıq şağire Robert Miñnullin Başqortstan awılları buyınça säyäxättä elek böyek tatar ädipläre yäşägän İldar Yuzeev, Mäcit Ğafuri, Ğalimcan İbrahimov, Därdmänd, Mirsäy Ämir, Zäki Wälidi yäşägän awıllarda bulıp, törle ideyä-praektlar belän qayttı. Ä alarnıñ tormışqa aşuın waqıt kürsäter.
Gölnaz Şäyxetdin