Ukraina prezidentı Viktor Yusçenkonıñ xökümätneñ premyerı itep Viktor Yanukoviçnı täqdim itärgä riza bulıp, Yuğarı Rada taratmawı turında xäbär Tatarstanda da bik küplärneñ iğtibarın cälep itte. Berençe çiratta, älbättä, älege yañalıq respublikada yäşäwçe ukrainnarnıñ. Äytergä kiräk, Tatarstanda yäşäwçe Ukraina watandaşları da, Rusiä watandaşı bulğan ukraina milläte wäkilläre dä ğomumän anda bara torğan säyäsi häm iqtisadi protsesslar belän qızıqsınıp toralar. Uzğan prezident saylawları waqıtında da alar tarixi watannarındağı wazğiätne küzätep barıp, andağı waqiğalarğa bitaraf qalmadı. Saylawlardan soñ kilep tuğan xäl häm anıñ nihayät çişelesen alar niçek qabul ittelär soñ? Bu xaqta bez Tatarstandağı ukrain milli cämğiäte citäkçese Vladimir Lyubçenkonıñ fikeren beleşergä telädek. Läkin ul başqa şähärgä cıyılışqa kitü säbäple, Lyubçenkonı soraştıru mömkinçelege bulmadı. Ä menä berniçä ukrainlı räsmi bulmağan söyläşüdä, Yanukoviçnıñ premyer bulıp täqdim itelüenä qänäğätlek belderde. Yusçenko prezident bulıp saylanğaç, salqınaya başlağan Ukraina belän Rusiä mönäsäbätläre xäzer kire cılınır, nığıy başlar, dip isäpli alar.
Ä menä Tatar ictimaği üzäge räise Tälğät Bariev isä Yusçenkonıñ Ukraina premyerı itep Viktor Yanukoviçnı täqdim itüen xuplamıym. Bu xaqta azatlıq radiosına ul menä närsälär belderde.
Ukrainanıñ köçle genä itep Yevropa tarafına barğanda, Yanukoviçnı premyer itep quyu, ul ber artqa çigenü, minemçä. Kievta, parlament qarşında torğan keşelär – alar olı yäştäge, iske zamannarğa teläwçe keşelär. Menä şuşındıy keşelär bügenge köndä ukrainada östenlek aldı. Läkin, minem fikeremçä, bu Ukrainanıñ demokratiägä barğanda waqıtlıça ğına çigenüe. Çönki tormışnı artqa borıp bulmıy, keşelek dönyası demokratiägä bara. Ä strategik perspektivanı alsaq, Ukraina inde ul barıber Yevropağa, NATOğa yul tota. Ölkän buın keşeläre monı añlamıy, läkin xakimiätkä yäşräklär kilgäç, Ukrainanıñ ber genä yulı bulır. Minemçä, bu wazğiät üzgärer häm Ukraina da, Rusiä dä, şul isäptän Tatarstan da, Yevropanıñ ber öleşe bulırlarSez tatar ictimaği üzäge räise Tälğät Barievnı işettegez. Ul Ukrainadağı xakimiät krizisınıñ çişeleşe xaqında üz fikerläre belän urtaqlaştı.
Gölnaz İlgizär