Şuşı könnärdä Respublikada İslam finansları buyınça xalıqara belem birü üzäge wäkilçelegeneñ eşlekle säfäre uza. Wäkilçelekne üzäkneñ töp idärä itüçese Ağil Natt citäkli. Pänceşämbedä älege üzäkneñ wäkilläre belän Tatarstanıñ säwdä häm tışqı iqtisadıy xezmättäşlek ministrlığında oçraşu uzdı. Oçraşuda Tatarstan territoriäsendä İslam qanunnarı buyınça eşläwçe finans institutların buldıru mäsäläse qaraldı. Qunaqlar respublika wäkillärenä "Tatarstan Respublikasında İslam bank sistemasın barlıqqa kiterü häm üsterü buyınça texnik-iqtisadıy nigezlämä eşläwgä täqdimen” kürsättelär.
Uzğan iyün ayında älege üzäkneñ wäkilläre Tatarstanğa kilep kitkännär ide inde. Bügenge köndä respublikada İslam qanunnarı buyınça eşläwçe finans institutların buldıru mömkinlege şaqtıy zur. Biredä süz şäriğät'kä nigezlänep eşläwçe iminiät şirkätläre, banklar xaqında bara. İslam qanunnarı Tatarstan xalqı öçen yat bulmağanlıqtan, älege mäsälägä zur qızıqsınu uyata. İslam qanunnarı buyınça eşläwçe banklar şaqtıy üzençälekle häm çağıştırmaça yaña finans strukturaları bulıp sanalalar. Äytik, monnan barı tik utız yıl elek barlıqqa kilgän İslam bankları kredit täqdim itkän öçen protsent stavkasın bilgelämilär, monnan tış mondıy banklar sotsial' programmalarnı ğämälgä quyuğa zur iğtibar birälär. İslam bankı keçe häm urta eşmäkärlekne üsterügä uñay yoğıntı yasayaçaq, monnan tış bu möselmannarğa üzläreneñ aqçaların qayda da bulsa saqlaw mömkinlegen birä.
Gölnaz Şäyxetdin