Mäskäwdä, Piterburda bulmasın taqırbaşlarnıñ rus bulmağan millät keşelären qıynawları, xatta üterüläre turında xäbärlär tuqtap tormıy. Şuşı könnärdä Mäskäwneñ qırım tatarları oyışmasınnan Mostafa Möxtärämov, Mäskäw ölkäse Dmitrov şähärendä taqır başlar qırım tatarı Asan Starkovnı qinawları turında söyläde. 24 yäşlek Asan Mäskäw ölkäsendä 4 yıl inde elektromontajnik bulıp eşlägän bulğan. Eştän qaytıp barğan waqıtta anıñ artınnan kilep başına suqqannar. Ul borılıp qarap, ber törkem taqır başlarnı ğına şäylärgä ölgergän. Çönki qıynaw suğulardan anıñ cuyğan. Añsız yatqan cirendä anı militsiä patrule tabıp, küp törle tän, bit cäräxätläre belän xastaxanägä alıp kilgän. Dmitrov xastaxänäsendä, taqırbaşlarnıñ mondıy höcümnärennän bu atnada ğına öçençe qıynalğan keşene alıp kildelär, dip äytkännär. Bügenge köndä Asan Mäskäwneñ 15 sanlı xastaxänäsendä däwalana. Asannıñ änise Zariä xanımnıñ äytüenä qarağanda, bitendäge yaralarğa da tüzärgä bulır ide, läkin qatı qıynaw näticäsendä Asannıñ ike küze berni dä kürmi. . Tabiblar äle soñğı süzne äytmägännär, läkin küzneñ cansız buluı, nervı cepselläreneñ imgänüe dip añlatalar. Asannıñ ätise İrfan Starkov Qazan tatarı, änise Zariä xanım qırım tatarı. Bezgä, Mäskäwgä ulı yanına kilgän Zariä xanım belän telefonnan elemtägä kerergä mömkinlek buldı. Ul Asan turında bu yaqlarğa kilep beraz eäläp aqça tuplarğa, annan soñ cir alıp öylänergä xıyallanğan ide, xäzer ike küzeneñ berse genä dä kürmi bit dip, bik açınıp söyläde. Häm yärdäm itüçelärgä, qırım tatarlarınıñ Mäskäw oyışmasına, küz tabibı Ğulciä Arcimatovağa häm başqalarğa räxmäten dä belderde.
Näzifä Kärimova, Mäskäw