12 avgust yäkşämbe könne irtä belän sänğät söyüçelär Qazannıñ Yılğa portınnan teploxodlarğa utırıp Yuğarı Oslan rayonı Qızıl Bayraq awılına yul tottılar.
Biredä 1920-1940 yıllarda cäy könnärendä tanılğan kompozitor Salix Säydäşev yäşi häm icat itä. Üz waqıtında Qızıl Bayraq Şärif Qamal, Ğadel Qutuy, Ğalimcan İbrahimov, Hadi Taqtaş, Şihap Äxmärov, Kärim Apanaev, Röstäm Yäxin kebek kürenekle ädäbiät, sänğät häm fän eşlekleläreneñ yaratqan yal itü urını bulğan. Xäzer isä şul çor tatar zıyalılarınıñ ruxi üzägenä äwerelgän älege awılda tanılğan yazuçılar, kompozitorlar, teatr häm filarmoniäse artistları, küpsanlı sänğät söyüçelär yıldağıça ber waqıtta cıyıla. Bu mädäni çara “Säydäşstanğa säyäxät”digän isem astında, G.Qamal teatrı citäkçese Şamil Zakirovnıñ initsiativası belän menä inde 7 tapqır ütkärelä.
Yolağağa äwerelgän älege bäyräm başınnan azağına qädär Säydäş ruxı, Säydäş muzıkası belän suğarıla. Sänğät bäyrämen alıp barğan jurnalist Flera Nizamova bäyrämneñ bıyılğı üzençälekläre häm üzeneñ bäyräm tä'sirläre belän “Azatlıq” radiosı belän dä urtaqlaştı.
“7 tapqır ütkärelä torğan “Säydäşstanğa säyäxät” bäyräme ul başqa yıllardan ayırmalı buldı. Çönki bıyıl tematika buyınça tögäl ssenariy buyınça bardı. Bütän yıllarda rejisser bulmıy torğan ide, ä bıyıl Qamal teatrı artistı Radik Bariev älege çaranıñ rejisserı itep bilgelände. Anıñ belän eşläwe bik ciñel buldı. Bolay xalıqnıñ tä'sirenä qarağanda bäyräm bik yaxşı uzdı. Xoday quşıp hawa torışı da bik qoyaşlı häm cılı buldı. İke teploxod bulıp kilgän keşe räxätlänep yal itte. Şul qädär qatnaşırğa telägän keşelär küp, xätta çaqırmağan keşelär dä kilep, bezne qatnaştırığız dip özgälände. İke bülektä dä İlham Şakirov cırlap, üzeneñ istälekläre belän urtaqlaştı. Şulay başqa yıllarda qabatlanmağan tağın ber närsä buldı: Ayrat Arıslanov üze yäş bulğan çaqta, yäğni 1950 yılda ul Salix Säydäşewnıñ 50 yäşlek yubileyen alıp barğan. Ul şul turıda ozın itep täfsilläp söyläde. Minemçä, “Säydäşstanğa säyäxät” ne oyıştırıluğa kitkän aqça üzen aqlıy, çönki bügenge köndä ef radioları kübäygäç klassik äsärlär bik siräk yañğırıy. Xalıq nigezdä popsa belän genä tuqlan, ä bit şuşı muzıka şulqädär sağınılğan häm tansıq. ”
Şulay itep, yäkşämbe könne Qızıl Bayraq awılında çın mäğnäsendä sänğät häm cır bäyräme ütte.
Gölnaz Şäyxetdin