Düşämbe kiçendä Qazanğa eşlekle säfär belän Rusiä eçke eşlär ministrı Räşid Nurgaliev kilde. Sişämbe könne säfär barışında Räşid Nurgaliev Tatarstan Eçke eşlär ministrlığı citäkçeläre belän bergä cinayätçelekkä qarşı köräş mäsäläläre buyınça kiñäşmädä qatnaştı, «29 kompleks» oyışqan törkemneñ cinayätçel eşçänlegen açuda aktiv qatnaşqan xoquq saqlaw orğannarı xezmätkärlären büläkläde.
Ağımdağı yılnıñ 17 iyülendä Tatarstannıñ Yuğarı mäxkämäsendä Çallınıñ "29-nçı kompleks" äğzaları häm başlıqlarına xökem qararı çığarıldı. Barlığı 32 keşe iregennän mäxrüm itelde: alarnıñ berse - ğömerlekkä. Cinayätçelär 21 ütereştä, 7 keşene urlawda, qaraqlıqta, äf'yun belän säwdä itüdä ğayıplände. Operativ-tikşerülär barışında alardan 50дән artıq atu qoralı tabıldı.
"Bügenge köndä militsionerlar xalıqnı borçığan iñ zur problemağa - oyışqan cinayätçelekkä qarşı köräşä. Rusiä häm Tatarstan citäkçelege, prokuraturaları, xoquq saqlaw orğannarı berdäm eş alıp baruları näticäsendä bu ölkädä uñışlar da bar dip äytergä mömkin. "29-nçı kompleks"tan tış ta, xäzerge waqıtta respublikanıñ xoquq saqçıları berniçä şaw-şulı eşne tikşerä", - dip bilgeläp ütte Mintimer Şäymiev büläkläw tantanasında. Räşit Nurgaliev isä üz çığışında Tatarstan - Rusiä Eçke eşlär ministrlığı soñğı yılda cirle xoquq saqlaw orğannarı belän ayıruça aktiv eşlägän töbäklärneñ berse buluın bilgeläp ütte. "Militsiä eşeneñ asılı - iñ qimmätle äyberne - keşe ğömeren saqlaw, anıñ xoquqların yaqlaw, - dide R.Nurgaliev. Ministr respublika xoquq saqlaw orğannarı açqan cinayätlärneñ 19 protsentqa artuın, şulay uq respublika militsionerları "İslam cämäğäte" häm "Xezbut-Taxrir äl-İslami" kebek terrorlıq törkemnärenä qarşı köräştä qatnaşuın telgä aldı.
Älege tantanadan soñ Räşit Nurgaliev Tatarstan prezidentı belän bergä respublika Eçke eşlär ministrlığınıñ administratsiä binası tözeleşen häm "Qoyaşlı şähär" mikrorayonında safqa basıp kilüçe toraq yortlarnı da qaradı. Älege yortlardan 2009 yılda 545 militsioner ğailäse yaña fatirlar alaçaq, dip xäbär itä respublika mäğlümat üzäkläre.
Gölnaz Şäyxetdin