Uñ köçlär berlege firkäse üzeneñ imidjın nıqlap üzgärtergä, programmalarına yaña fikerlär, yañalıqlar kertügä kereşte. Älege ğämällär firkäneñ Rusiä Däwlät Dumasına uzğan soñğı saylawlardağı uñışsızlığınnan soñ başlanıp kitte. Uñ köçlärneñ Tatarstandağı bülekçäse wäkilläre dä älege eştä bik aktiv qatnaştı. Alarnıñ firkäneñ yaña programma proyektın eşläde. Häm alar yasağan proyekt şundıy uñışlı bulıp çıqqan ki, anı xätta Uñ köçlär berlegeneñ citäkçese Nikita Belıx ta xuplağan.
SPSnıñ Tatarstan bülekçäseneñ Başqarma komitetı citäkçese Pavel Sigal süzlärenä qarağanda, tatarstanlılar üzläreneñ programmalarında Uñ köçlär firkäseneñ töp ideologiäsenä xıyänät itmägän.
Bez berniçek tä SPSnıñ töp yünäleşe yulınnan çigenmädek. İldä demokratiäne, eşmäkärlekne üsterü, sotsial’ yaqlawğa moxtac keşelärne yaqlaw häm başqa yünäleşlär qala. Bez barı tik eş yünäleşlären konkretlaştırırğa ğına buldıq. Bigräk tä, yaqın kiläçäkkä. Üzebezneñ programma proyektında bez ğadi xalıq üz arada, öydä fikerlär yörtkän temalarğa konkret cawaplar tabarğa tırıştıq – monda sälämätlek saqlaw, mäğärif, demografiä, mäğlümät çaraları häm başqalar. Bezneñçä, küp kenä mäs’älälärne Rusiä häm anıñ xalqı mänfäğätlärennän çığıp xäl itelergä tieş. Monda yalğan liberal bulıp, bäyäsenä qaramıyça eşlärgä kiräk diärgä yaramıy. Monda patriotik kapitalizm turında süz alıp barıp bula. Bu urta xälle xalıq qatlamına tayanğan kapitalizm, anı buldırırğa kiräk RusiädäPavel Sigaldan bez, SPS firkäseneñ milli programması barmı dip tä soraştıq. Bu xaqta ul menä närsä dide.
Bar, älbättä, bar. Bez bik yaxşı añlıybız, tatar xalqınıñ barı ber genä däwläte – tatarstan bar. Şuña kürä, bar xalıqnıñ da xoquqlarınıñ tigezlegen saqlaw şartında, tatar xalqınıñ telen, mädäniät yaqlaw kiräk. Bu bezneñ eşneñ bik ähämiätle öleşe dip sanıybız bez Kiläçäkkä plannarğa kilgän isä, Uñ köçlär berlege firkäse 2007 yılda Rusiä Däwlät Dumasına saylawlarda 7 protsentlı baryernı ütep, Dumada üzläreneñ fraksiälären buldırırğa tırışaçaq. Firkäneñ Tatarstan bülekçäseneñ plannarın kilgändä, alar respublika Däwlät Şurasında üzläreneñ nämzätlären kübräk kürergä teli. Pavel Sigal däwam itä.
Tatarstanda bezneñ inde xäzer dä Däwlät Şurasında ike deputatıbız bar – Ştanin häm Tarkaev. Minemçä, bezneñ kiläse saylawlarğa maqsatıbız – Däwlät Şurasında uñ köçlärneñ 5-10 deputattan torğan fraksiäne buldıru. Bu tormışqa aşırırlıq maqsat. Annarı soñ, bu respublika öçen dä kiräk. Bu xaqta bez Tatarstan citäkçelege belän dä söyläşkänebez bar. Alar da parlamentta uñ köçlärneñ kiräklegen äytä. Älbättä, bezgä bu eştä berkem dä yärdäm itmäyäçäk. Läkin respublikada bezgä qarşılıq kürsätep, bezgä nindi basım yasap toruçılar da yuq. Şuña da, bezneñ saylawlardağı uñışsızlıqlarıbız – ul barı tik bezneñ genä eşläp citkermäwebez. Bez inde üzebez öçen näticälär yasadı. Bez firkäbezne yañarttıq, bezneñ xäzer yaña äydäp baruçı, yaña Säyäsi Şura. Menä xäzer yaña programma da buldırdı. Ul federal’ däräcädä qabul itelmägän oçraqta da, tatarstan däräcäsendä ul qalaçaq, bez anı alğa alıp baraçaqbızBu SPSnıñ Tatarstan bülekçäseneñ Başqarma komitetı citäkçese Pavel Sigal fikerläre ide.
Ä Uñ köçlär berlegeneñ yaña programma proyektına kilgändä, 19 sentäberdä Mäskäwdä Tatarstanlılar täqdim itkän häm başqa proyektlar qaralaçaq. Ä nindi programma qabul iteläçäge SPSnıñ noyäber ayında uzaçaq qorıltayında bilgele bulaçaq.
Gölnaz İlgizär