Piramida küñel açu üzägendä comğa kiçendä ütkän Altın mönbärneñ yabılu tantanasında festival’dä qatnaşuçılar, jyuri äğzäläre, qunaqlar – Mäskäwdän kilgän ällä ni tanılmağan kino artistları buldı. Kiçädä, ğädättägeçä, II xalıqara möselman fil’mnarı festivale ciñüçelären qotlaw da uzdı. Büläklär festival’dä şaqtıy taratıldı. Şularnıñ iñ möhimnäre belän sezne dä tanıştırıp kitik. Alın Mönbärneñ töp bülägen – iñ yaxşı fil’m nominatsiäsendäge priznı İranda töşerelgän Sleza xoloda – Salqın yäşe fil’mı yawladı.
Fil’mnıñ rejisserı Azizulla Xämidnezäde dä büläksez qalmadı. Anı festival’neñ iñ yaxşı rejisserı isemenä layıq, dip sanadılar. Fil’mda töp xatın-qız rolen başqarğan Gölşiftex Faraxani isä iñ yaxşı xatın-qız rolen başqaruçı nominatsiäsendä ciñep çıqtı. İr keşe rolen iñ äybät başqaruçı bularaq jyuri äğzäläre Qazaqstannan Tölegän Quanışevnı Altın mönbär belän büläkläde.
Başqa büläklärgä kilsäk, dokumental’ fil’mnar arasında iñ-iñe dip Äfğanstanda töşerelgän Pamir cirlege fil’mı tabıldı. Animatsion fil’mnar arasında ciñüne Rusiädä yasalğan Äl-Fatixa mul’tfil’mı yawladı.
Altın mönbär festivalendä maxsus prizları da tapşırıldı. Festival’neñ jyurien citäkläwçe Vadim Abdraşitov Kino sänğätenä kertkän zur öleşe öçen büläk aldı, anı Rusiä Möftilär Şurası räise Rawil Ğäynetdin tapşırdı. İslam dönyası telekanalı isä üzeneñ bülägen Söğüd Ğäräbstanınnan kilgän dokumental’ fil’mğa birde. Anıñ rejisserına qazan kremle töşerelgän keläm birdelär. Yabılu tantanasınıñ axırında säxnägä respublikanıñ Mädäniät ministrı Zilä Wälieva mende. Üzeneñ çığışında ul festival’ qunaqlarına ğına tügel, ä tatarstanlılarğa da räxmäten belderde.
Zilä Wälieva Altın mönbärneñ soñğı bülägen - Tatarstan prezidentı Mintimer Şäymievnıñ maxsus prizın tapşırdı. Älege büläkkä Qırğızstan, Fransiä häm Rusiä tarafınnan töşerelgän Ata-babalar sandığı fil’mı layıq dip tabıldı.
Gölnaz İlgizär