10 oktäberdä Rusiä Federatsiäse möftilär şurası räise Rawil xäzrät Ğäynetdin, Amerika Quşma ştatlar ilçelege, tışqı eşlär analitigı Timoti Sandusski häm ilçelekneñ ikençe sekretare Syuzanna Bodayın belän oçraştı. Bu oçraşuğa alar AQŞ däwlät departamentı sorawı belän kilülären beldergännär. Bu xaqta Rawil Ğäynetdin, alarnı Rusiädä möselmannarğa mönäsäbät qızıqsındıra; alar irtägä şuşı uq mäs'älä belän Qazanğa da barırğa cıyınalar, çönki AQŞ möselman dönyasında baytaq qına yalğışlar eşläde. Bälki alar bezneñ belän dä çağıştırıp, ul yalğışlar östendä eşlärgä telilärder, dip belderde. Amerika ilçelegennän möftiätkä üzläre kilsälär, Rusiä Federatsiäseneñ eçke eşlär ministrı Raşit Nurğaliev yanına Rawil xäzrät üze barğan. Bu oçraşunıñ säbäplären ul soñğı waqıtta Rusiä töbäklärendä möselmannarğa bulğan höcümnär belän añlattı. Yäroslawl'dä mäçetne şartlatu, Tver'dä möselman ziratında qäber taşların cimerep, svastikalar yasaw, Kislovodskiyda imamnı üterü häm başqa mäs'älälär turında söyläştek dide, Rawil xäzrät. Bu söyläşülärdä üzara añlaşu da, alğa taba kileşep eşläw turında fikerlär äytelgän. Raşit Nurğaliev Rusiäneñ möselman din ähelläre, yaş imamnarı belän oçraşunı da üzeneñ planına kertäçägen beldergän. Bu xäbärlärgä östäp, möftiätneñ matbuğat üzägendä işetkän xäbärne dä citkeräse kilä: Yäroslawl'dä mäçetne şartlatuğa tırışular, taqırdaşlarnıñ imtixan birüläre bulğan. Bu imtixannı qabul itärgä Peterbur taqırbaşları wäkile dä kilgän. Bu xaqta, Yäroslavl'neñ eçke eşlär idäräse citäkçese belän söyläşkän ministr Nurğäliev beldergän.
Buğenge köndä 2007-2009 nçı yıllar öçen yäşlärne patriotik tärbiäläw programması qabul itelä. Taqırdaşlar da bit üzlären Rusiä patriotları dip atıylar. Mondıy programmalar taqırbaşları yaña “batırlıqlarğa” kütärmäs mikän?
Näzifä Kärimova , Mäskäw