Böten dönya tatar kongressınıñ Tatar mäğärife häm fän dip atalğan daimi komissiäse utırışına keşe ällä ni küp kilmägän ide bu yulı. Ällä inde cıyılışnıñ ber cirdä bula dip iğlan itelep, bötenläy başqa binada uzuı, ällä başqa säbäptän, läkin tatar mäğärife problemaları xaqında fikerläşergä ike distä tiräse keşe genä cıyıldı. Alar arasında komissiä äğzäläre dä az buldı. Respublikanıñ Fän häm mäğärif ministrlığınnan da aldan äytelgän ministr urınbasarı tügel, ä şuşı eşlär belän şöğellänüçe bülek xezmätkär genä kilgän ide. Cıyılışta şulay uq ğalimnär, Penza ölkäsennän, Çiläbedän, Novosibirskidan wäkillär qatnaştı.
Süzne Tatar kongressında milli mäğärif problemaları belän şöğellänüçe xezmätkär Gölnur Arxipova başlap cibärde. Ul ber yıl däwamında kongressnıñ älege yünäleştä eşlägän eşläre belän tanıştırdı. Anıñ süzlärenä qarağanda, Tatar kongressı yärdämendä Rusiä töbäklärennän Tatarstannıñ yuğarı uqu yortlarına kerüçelär sanı artqan, etnik turizm yünäleşe üseş alğan, töbäklärdäge tatar tele uqıtuçıları öçen belemne kütärü kursları oyıştıruda yärdäm kürsätelgän häm başqa şundıy eşlär başqarılğan. Ministrlıqnıñ milli bülege xezmätkäre Gölfiä Ğäynetdinova isä ministrlıq tarafınnan eşlängän häm kiläçäktä başqarırğa kiräkle eşlär turında täfsilläp söyläde. Tatarstannıñ Ministrlar kabinetınıñ bülek wäkile Firaya Şäyxieva üz çığışında mondıy cıyılışlarda töbäklärdän kilgän millättäşlärebezne kübräk kürergä teläwen äytte. Häm milli mäğärifne, telne saqlaw wä üsterü eşendä barı tik qanunnarğa ğına nigezlänergä kiräklegen äytte.
Xäyer, Firaya Şäyxievadan soñ üz fikerläre belän urtaqlaşqan Marat Lotfullin qanunnar äybät, läkin alarnı ütäw öçen ber genä dä struktura da yuq dip zarlandı. Häm Tatar tele uqıtuçıları qorıltayında qabul itelgän qararlarnıñ ütälmäwenä borçılu belderde.
Bezneñ qorıltayda quyılğan iñ zur mäs’älälärneñ berse – Rusiä külämendä tatar mäğärifen üsterü programmasın buldıru. Anı eşläp Rusiäneñ Fän häm mäğärif ministrlığına täqdim itep, anıñ tarafınnan qabul itterergä ide. Programma älege köngä qädär buldırılmağan häm anıñ östendä eş alıp ta barılmıy. Ul buldırılğançı bez şulay partizança cıyılıp söyläşüebezne genä däwam itäçäkbezMilli mäğärifne, telne saqlaw häm üsterü turında menä şundıy çirattağı söyläşü uzdı Tatar kongressınıñ Tatar mäğärife häm fän komissiäseneñ utırışında.
Gölnaz İlgizär