Şuşı könnärdä genä berniçä qızıqlı yaña bilgelänülär turında mäğlümätlär taraldı. Alar nigezdä Qazan başlığı alışınıp, elekkege mer Kamil İsxaqovnıñ keşeläre başqa eşkä küçep, alar urınına yaña citäkçe komandası wäkilläre kilügä bäyle. Mäsälän, Qazannıñ toraq säyäsäte idäräse citäkçese itep Emil Xösnetdinov bilgelände. Bu wazifağa bilgelängänçe ul Qazannıñ toraq investitsiä kompaniäsen citäklägän. Ä menä İsxaqov komandası keşeläre dip sanalğan qazanlılar isä, beräm-beräm Yıraq Şärıqqa kitülären däwam itä. Şundıy ber kitüçe 9 noyäber könne Rusiä prezidentı qararı belän räsmi räweştä eşkä bilgelände. Qazannıñ Eçke eşlär idäräse citäkçese polkovnik Fayaz Şabaev xäzer Rusiä Eçke eşlär ministrlığınıñ Yıraq Şärıq buyınça idäräse başlığınıñ iqtisadi iminlek buyınça urınbasarı wazifaların başqaraçaq.
Tağın ber tatarstanlı çit cirlärgä eşlärgä kitärgä cıyına. İnde xäbär itkänebezçä, KamAZ berläşmäseneñ general’ direktorı Sergey Kogoginğa AvtoVAZ şirkäten citäklärgä täqdim itkännär ide. KamAZnıñ press üzäge wäkilläre älege bu mäğlümätne raslamasa da, kommersant gäcite yazuınça, Sergey Kogoginnıñ AvtoVAZnı citäklärgä rizalığı inde alınğan ikän. Xäyer, ul KamAZnı da taşlarğa cıyınmıy. Kogogin ciñel häm yök maşinaları citeşterä torğan şuşı ike şirkätne dä bergä citäklärgä cıyına, dip yaza Kommersant gäcite. Kiläçäktä xätta älege ike zur şirkätne berläşterü mömkinlege dä qarala ikän. Xäyer, AvtoVAZ häm KamAZnı älege wazğiät qänäğätländersä dä, qayber mäğlümätlärgä qarağanda, Rusiäneñ iqtisadi üseş ministrlığı berläşügä qarşı kilergä dä mömkin.
Gölnaz İlgizär