İske qaraşlı, satılğan yazuçılar bezne qızıqsındırmıy di – xäzer tatar telle zamana yäşläre. Alar al'ternativ muzıka cırlıylar, tıñlıylar. Çit ilneñ fälsäfi kinoların qarıylar, irekle kienälär, irekle tatar telendä söyläşälär, dini yolalarnı da belälär. Belemnäre dä, dönyağa qaraşları da bar. Fani dönyanıñ ğädelsezlegenä rizasızlıqların da qurıqmıyça belderälär.
“İttifaq” törkeme; küzlär tulı ömet, ilham qalmadı diärlek disä dä, bar ikän äle ul tatarça şiğer, xikäyä yazuçı tatar yäşläre. Bıyıl 6nçı tapqır “İdel” yäşlär üzäge häm Tatarstan yazuçılar berlege belän bergä oyıştırılğan “İdelem aqçarlağı” bäygesendä 85 yäş yazuçı qatnaşu da monı kürsätä, äytä, sizderä. Tormış mäşäqätlärenä, pıçraqlıq-ğadelsezleklärenä artıq iğtibar birmiçä, xıyalğa birelep, ädäbi äsärlär icat itüçe qızlar häm yegetlär 17 noyäberdän 20 noyäbergä qädär Qazan çitendäge “Baytik” alanında üzlärençä tuslandılar. “İdelem aqçarlağı”n oyıştıruçılarnıñ berse, “İdel” yäşlär üzäge citkäçese Miläwşä Şärapova söyli:
- Bik qızıqlı programma ide. Yazuçılar berlegennän küp kenä tanılğan yazuçılar kilgän ide.
Bäygedä qatnaşuçı Tatarstannıñ törle rayonnarınnan cıyılğan yäşlär belän bergä Başqortstan, Udmurtiä, Irınburdan, Permnän kilgän yäş qäläm tibrätüçeläre dä bula. Miläwşä Şärapova bäygeneñ yomğaqları belän tanıştıruın däwam itä:
- Bezneñ ike gran - pri buldı. Çäçmä äsär häm şiğriät buyınça. Şiğriät buyınça Rifat Säläxov, KDU studentı. Ä çäçmä äsär buyınça Aydar Zäkiev – Ufa yegete. Şulay uq buldı drama yazıp büläk aluçılar.
Xäzer inde “İdelem aqçarlağı” bäygesendä qatnaşuçı bularaq tügel ä küzätüçe, tantanalı açılışların açıp cibärüçe häm yomğaqlawçı “Yaña ğasır” telekompaniäseneñ yäş alıp baruçısı Aysılu Leronnı tıñlap qarıyq:
- Bik küp buldı qızıqlı şäxeslär belän oçraşular, master-klasslar äzräk ide. Başqa yıllar belän çağıştırğanda yaña yäş yazuçılar küp. Mäktäp balaları da xäyran ide. Yıldağıça qızlar kübräk. Monda qatnaşuçı yäşlär alar tınıç yäşlär, üzlärençä cıyılışıp aqrın ğına, ipläp kenä söyläşälär, küñel açalar. Bötenläy başqa möxit dip äytergä bula.
“İdelem aqçarlağı” bäygese yäş qäläm tibrätüçelärne xäzerge tatar yazuçıları belän oçraştıruçı berdänber çara dip äytergä bula. Bu yäş yazuçılar bäygese ikençe yılğa da bulaçaq dip oyıştıruçılar, temalar da irekle. Şiğer, proza, drama qaysın telisez şunı yaza alasız. Yıl sayın qatnaşuçılarnıñ yaxşı dip tapqan ädäbi äsärläre ayırım kitapçıq itep çığarıla. Bu bäygelärne oyıştırırğa omtılıp yörgän “İdel” yäşlär üzäge xezmätkärlärenä räxmät inde dilär, qatnaşuçı yäşlär. Mömkinlekläre çikle buluğa qaramastan tırışalar-tırmaşalar. Yuğisä, bügenge köndä alar utıra torğan ofisnıñ telefonı da özek.
Röstäm İsxaqi
